យោធាអ៊ីស្រាអែល បានបើកការវាយប្រហារច្រកអាកាសទ្រង់ទ្រាយធំនៅភាគខាងត្បូងប្រទេសលីបង់ កាលពីថ្ងៃព្រហស្បតិ៍ (៦ វិច្ឆិកា) ដោយសម្លាប់មនុស្សមួយចំនួន បន្ទាប់ពីចេញបទបញ្ជាជម្លៀសសម្រាប់ទីតាំងជាច្រើន ដោយនិយាយថា ក្រុមប្រដាប់អាវុធលីបង់ ហេសបូឡា កំពុងតែព្យាយាមសាងសង់សមត្ថភាពយោធារបស់ខ្លួនឡើងវិញនៅទីនោះ។

បញ្ជាជម្លៀស និងការវាយប្រហារនេះ កើតឡើងក្នុងពេលមានកិច្ចព្រមព្រៀងឈប់បាញ់ដែលសម្រេចបានកាលពីឆ្នាំមុន ក្នុងបំណងបញ្ចប់ការប្រយុទ្ធគ្នាជាង ១ឆ្នាំរវាងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់ ហើយក៏កើតឡើងបន្ទាប់ពីកិច្ចខិតខំប្រឹងប្រែងរបស់កងទ័ពលីបង់ជាច្រើនខែ ក្នុងការបោសសម្អាតបន្ទាយក្រុមហេសបូឡា នៅភាគខាងត្បូង។

អ្នកនាំពាក្យយោធាអ៊ីស្រាអែល លោក Avichay Adraee បានចេញបញ្ជាជម្លៀស ៣ទីតាំងក្នុងពេលដំណាលគ្នាលើបណ្ដាញសង្គម X វេលាម៉ោងក្នុងស្រុក ៣រសៀល កាលពីថ្ងៃព្រហស្បតិ៍ ជាមួយនឹងផែនទីបង្ហាញអគារក្នុងភូមិ Aita al-Jabal ភូមិ Al-Tayyiba និងភូមិ Tayr Debba ។ បញ្ជាជម្លៀសចំនួនពីរបន្ថែមទៀតត្រូវដាក់ចេញតាមក្រោយ សម្រាប់ទីប្រជុំជនផ្សេងទៀតនៅភាគខាងត្បូង។ ការវាយប្រហារតាមអាកាសក៏ចាប់ផ្តើម ប្រហែល ១ម៉ោងបន្ទាប់ពីបទបញ្ជានេះ ដោយកម្ទេចអគារជាច្រើន បង្កជាផ្សែងក្រាស់ឃ្មឹកឡើងលើមេឃ។

ភាពភ័យខ្លាចកំពុងកើនឡើងខ្លាំងនៅលីបង់ ដែលថាអ៊ីស្រាអែល អាចនឹងបន្តយុទ្ធនាការយោធាផ្លូវអាកាសពេញបន្ទុកឡើងវិញ ជាពិសេសបន្ទាប់ពីមេដឹកនាំអ៊ីស្រាអែលព្រមានចាត់វិធានការលើក្រុមហេសបូឡា ប្រសិនបើលីបង់ មិនបង្កើនកិច្ចប្រឹងប្រែងរំសាយអាវុធរបស់ក្រុមនេះទេនោះ។

កាលពីថ្ងៃព្រហស្បតិ៍ដដែលនេះ ហេសបូឡា និយាយថា ខ្លួនប្តេជ្ញាចិត្តចំពោះបទឈប់បាញ់ ប៉ុន្តែក៏ព្រមានថា ខ្លួនរក្សា "សិទ្ធិស្របច្បាប់" ដើម្បីទប់ទល់នឹងអ៊ីស្រាអែល។ ក្រុមសកម្មប្រយុទ្ធនេះបានបដិសេធ មិនព្រមរំសាយអាវុធទាំងស្រុងទេ ប៉ុន្តែក៏មិនបានរារាំងកិច្ចប្រឹងប្រែងរបស់កងទ័ពលីបង់នៅភាគខាងត្បូង ហើយក៏មិនបានបាញ់អាវុធលើអ៊ីស្រាអែលទៀតដែរ ចាប់តាំងពីបទឈប់បាញ់ចូលជាធរមានកាលពីឆ្នាំមុនមក៕