កងកម្លាំងគាំទ្ររហ័ស (RSF) និយាយថា ខ្លួនបានយល់ព្រមចំពោះសំណើរបស់សហរដ្ឋអាមេរិកសម្រាប់បទឈប់បាញ់នៅស៊ូដង់ បន្ទាប់ពីការប្រយុទ្ធគ្នាជាងពីរឆ្នាំជាមួយកងកម្លាំងប្រដាប់អាវុធស៊ូដង់ (SAF)។ 

ក្រុមប៉ារ៉ាយោធាបាននិយាយក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា ខ្លួននឹងទទួលយក បទឈប់បាញ់មនុស្សធម៌ ដែលស្នើឡើងដោយក្រុមសម្របសម្រួលដឹកនាំដោយសហរដ្ឋអាមេរិក ដែលរួមមានអារ៉ាប៊ីសាអ៊ូឌីត អេហ្ស៊ីប និងអារ៉ាប់រួម ដើម្បីដោះស្រាយផលវិបាកមនុស្សធម៌ដ៏មហន្តរាយនៃសង្គ្រាម និងដើម្បីបង្កើនការការពារជនស៊ីវិល។

យ៉ាងណាពុំមានការអត្ថាធិប្បាយភ្លាមៗពីយោធាស៊ូដង់នៅឡើយទេ។

កាលពីដើមសប្តាហ៍នេះ ទីប្រឹក្សាជាន់ខ្ពស់អាមេរិកសម្រាប់កិច្ចការអារ៉ាប់ និងអាហ្វ្រិក លោក Massad Boulos បាននិយាយថា កិច្ចខិតខំប្រឹងប្រែងកំពុងដំណើរការដើម្បីឈានដល់បទឈប់បាញ់ ហើយភាគីជម្លោះបានយល់ព្រមជាគោលការណ៍។

លោក Boulos បាននិយាយកាលពីថ្ងៃចន្ទនៅក្នុងសេចក្តីថ្លែងការណ៍មួយចុះផ្សាយដោយសារព័ត៌មាន Sudan Tribune ថា ពួកលោកមិនទាន់បានកត់ត្រាការជំទាស់ដំបូងណាមួយពីភាគីណាមួយនៅឡើយទេ។ ឥឡូវនេះពួកលោកកំពុងផ្តោតលើព័ត៌មានលម្អិតដ៏ល្អិតល្អន់។

ដោយរាយការណ៍ពីទីក្រុង Khartoum លោក Hiba Morgan របស់ទីភ្នាក់ងារសារព័ត៌មាន Al Jazeera បាននិយាយថា ផែនការនេះនឹងចាប់ផ្តើមជាមួយនឹងបទឈប់បាញ់មនុស្សធម៌រយៈពេលបីខែ ដែលអាចបើកផ្លូវសម្រាប់ដំណោះស្រាយនយោបាយយូរអង្វែង ដែលនឹងរួមបញ្ចូលរដ្ឋាភិបាលស៊ីវិលថ្មីមួយ៕