ក្រុមប្រឹក្សាសន្តិសុខអង្គការសហប្រជាជាតិ បានបោះឆ្នោតដើម្បីដកទណ្ឌកម្មលើប្រធានាធិបតីស៊ីរី លោក Ahmed al-Sharaa និងរដ្ឋមន្ត្រីក្រសួងមហាផ្ទៃលោក Anas Khattab បន្ទាប់ពីសេចក្តីសម្រេចគាំទ្រដោយសហរដ្ឋអាមេរិក។

នៅក្នុងចំណាត់ការដ៏ទូលំទូលាយ ក្រុមប្រឹក្សាសន្តិសុខអង្គការសហប្រជាជាតិ បានដកឈ្មោះមន្ត្រីរដ្ឋាភិបាលស៊ីរីចេញពីបញ្ជីទណ្ឌកម្មក្រុមរដ្ឋអ៊ីស្លាម(ISIS) និងក្រុមអាល់កៃដា នៅក្នុងសេចក្តីសម្រេចដែលត្រូវបានអនុម័តដោយសមាជិកក្រុមប្រឹក្សាកាលពីថ្ងៃព្រហស្បតិ៍។ ប្រទេសចិន បានបោះឆ្នោតអនុប្បវាទ។

ការដកទណ្ឌកម្មជាផ្លូវការលើលោក al-Sharaa យ៉ាងទូលំទូលាយ ដោយត្រូវបានលើកលែងរាល់ពេលដែលលោកធ្វើដំណើរទៅខាងក្រៅប្រទេសស៊ីរី ក្នុងតួនាទីរបស់លោកជាមេដឹកនាំប្រទេស។ ការបង្កកទ្រព្យសម្បត្តិ និងបម្រាមលើសព្វាវុធក៏នឹងត្រូវបានដកចេញផងដែរ។

លោក Al-Sharaa ដែលដឹកនាំក្រុមអ្នកប្រយុទ្ធប្រឆាំង បានផ្តួលរំលំរដ្ឋាភិបាលរបស់លោកប្រធានាធិបតី Bashar al-Assad កាលពីខែធ្នូ។ ក្រុមរបស់លោក គឺក្រុម Hayat Tahrir al-Sham (HTS) បានចាប់ផ្តើមការវាយលុកនៅថ្ងៃទី ២៧ខែវិច្ឆិកាឆ្នាំ២០២៤ ដោយបានទៅដល់ទីក្រុងដាម៉ាស ក្នុងរយៈពេលត្រឹមតែ ១២ថ្ងៃប៉ុណ្ណោះ។ ក្រុម Hayat Tahrir al-Sham (HTS) បានស្ថិតនៅក្នុងបញ្ជីទណ្ឌកម្មលើក្រុមរដ្ឋអ៊ីស្លាមនិងក្រុមអាល់កៃដារបស់ក្រុមប្រឹក្សាសន្តិសុខអង្គការសហប្រជាជាតិ(UNSC) ចាប់តាំងពីខែឧសភា ឆ្នាំ២០១៤។ ចាប់តាំងពីឡើងកាន់តំណែងមក លោក al-Sharaa បានអំពាវនាវឱ្យសហរដ្ឋអាមេរិកដកទណ្ឌកម្មជាផ្លូវការលើប្រទេសរបស់លោក។