រដ្ឋបាលរបស់លោកប្រធានាធិបតីអាមេរិក Donald Trump បាននិយាយកាលពីថ្ងៃព្រហស្បតិ៍ (៦ វិច្ឆិកា) ថា ខ្លួននឹងបន្តកិច្ចចរចាជាមួយប្រទេសចិន ជុំវិញភាពគ្របដណ្ដប់យ៉ាងលើសលប់លើវិស័យកសាងនាវា និងការដឹកជញ្ជូនតាមសមុទ្រ ខណៈរដ្ឋបាលត្រៀមផ្ដល់ភាពផ្លូវការសម្រាប់ការផ្អាករយៈពេល ១ឆ្នាំនៃថ្លៃសេវាកំពង់ផែរបស់អាមេរិក លើនាវាដែលមានទំនាក់ទំនងជាមួយចិន ជាផ្នែកមួយនៃកិច្ចព្រមព្រៀងដ៏ទូលំទូលាយ ដើម្បីកាត់បន្ថយភាពតានតឹងពាណិជ្ជកម្ម។

ការិយាល័យតំណាងពាណិជ្ជកម្មអាមេរិក (USTR) បាននិយាយក្នុងសេចក្តីជូនដំណឹងស្តីពីការចុះឈ្មោះសហព័ន្ធថា ខ្លួននឹងផ្អាកនូវរាល់សកម្មភាពកំពង់ផែលើចិន រយៈពេល ១ឆ្នាំចាប់ពីថ្ងៃទី១០ ខែវិច្ឆិកា ខាងមុខនេះ ដែលមកពីការស៊ើបអង្កេតលើការអនុវត្តពាណិជ្ជកម្មអយុត្តិធម៌ "ជំពូកទី៣០១" របស់ខ្លួន។

ការបន្ធូរបន្ថយ ១២ខែ លើតម្លៃប៉ាន់ប្រមាណ ៣,២ពាន់លានដុល្លារជារៀងរាល់ឆ្នាំ ក្នុងថ្លៃសេវាកំពង់ផែអាមេរិក លើនាវាធំៗដែលសាងសង់ដោយចិន គឺស្ថិតក្នុងចំណោមកិច្ចព្រមព្រៀងដែលសម្រេចបាននៅកូរ៉េខាងត្បូង ដោយលោក Trump និងប្រធានាធិបតីចិន លោក Xi Jinping កាលពីចុងខែតុលា។

ការិយាល័យ USTR បាននិយាយក្នុងសេចក្តីជូនដំណឹងថា "អនុលោមតាមកិច្ចព្រមព្រៀងនេះ សហរដ្ឋអាមេរិកនឹងផ្អាកថ្លៃកំពង់ផែរយៈពេល ១ឆ្នាំ ដោយចាប់ផ្តើមពីថ្ងៃទី១០ ខែវិច្ឆិកា ឆ្នាំ២០២៥" ដោយន្ថែមថា "ទីក្រុងវ៉ាស៊ីនតោនក៏នឹងចរចាជាមួយចិន ដោយយោងតាមជំពូកទី៣០១ ទាក់ទងនឹងបញ្ហាដែលបានលើកឡើង ក្នុងការស៊ើបអង្កេតលើការអនុវត្តពាណិជ្ជកម្ម" ។

សេចក្តីជូនដំណឹងនេះមិនបានលម្អិតថាការចរចានឹងចាប់ផ្តើមដូចម្ដេច ឬមានគោលបំណងអ្វីឡើយ ដោយគ្រន់តែបង្ហើបថា អាមេរិកនឹងបន្តកិច្ចប្រឹងប្រែងរបស់ខ្លួនក្នុងការបង្កើនវិស័យកសាងនាវាក្នុងស្រុក រួមទាំងតាមរយៈកិច្ចពិភាក្សាជាមួយសម្ព័ន្ធមិត្ត និងដៃគូសំខាន់ៗ៕