ប្រធានាធិបតីអាមេរិក លោក Donald Trump បាននិយាយកាលពីថ្ងៃព្រហស្បតិ៍ ៦ វិច្ឆិកាថា អ៊ីរ៉ង់បានស្នើសុំឱ្យមានការដកទណ្ឌកម្មធ្ងន់ធ្ងររបស់សហរដ្ឋអាមេរិកប្រឆាំងនឹងទីក្រុងតេអេរ៉ង់ ហើយថាលោកបើកចំហសម្រាប់ការពិភាក្សា ។

លោក Trump បាននិយាយក្នុងអំឡុងអាហារពេលល្ងាចជាមួយក្រុមមេដឹកនាំអាស៊ីកណ្តាលថា និយាយឱ្យត្រង់ទៅ អ៊ីរ៉ង់បានសួរថាតើទណ្ឌកម្មអាចដកចេញបានឬអត់។ អ៊ីរ៉ង់ទទួលរងទណ្ឌកម្មធ្ងន់ធ្ងរខ្លាំងណាស់ពីសហរដ្ឋអាមេរិក ។ 

រូបលោកបើកចំហចំពោះការស្តាប់រឿងនោះ ហើយពួកលោកនឹងរង់ចាំមើលថាមានអ្វីកើតឡើង ប៉ុន្តែលោកនឹងបើកចំហចំពោះការពិភាក្សាឈានទៅរកការដកទណ្ឌកម្ម។ 

ប្រទេសលោកខាងលិច រួមទាំងសហរដ្ឋអាមេរិក បានចោទប្រកាន់អ៊ីរ៉ង់ជាយូរមកហើយថាកំពុងស្វែងរកអាវុធបរមាណូ ខណៈអ៊ីរ៉ង់ទទូចថាកម្មវិធីនុយក្លេអ៊ែររបស់ខ្លួនគឺសម្រាប់គោលបំណងសន្តិភាពតែប៉ុណ្ណោះ ។

ទីក្រុងតេអេរ៉ង់បានរងទុក្ខក្រោមទណ្ឌកម្មអន្តរជាតិអស់រយៈពេលជាច្រើនឆ្នាំ ជាពិសេសបន្ទាប់ពីសហរដ្ឋអាមេរិកបានដកខ្លួនចេញពីកិច្ចព្រមព្រៀងនុយក្លេអ៊ែរអន្តរជាតិជាមួយទីក្រុងតេអេរ៉ង់ក្នុងឆ្នាំ ២០១៨ និងបានដាក់ទណ្ឌកម្មដ៏តឹងរ៉ឹងឡើងវិញ។

នៅពាក់កណ្តាលខែមិថុនា អ៊ីស្រាអែលបានចាប់ផ្តើមយុទ្ធនាការទម្លាក់គ្រាប់បែកមិនធ្លាប់មាន ប្រឆាំងនឹងអ៊ីរ៉ង់ បង្កឱ្យមានសង្គ្រាមមួយ ដែលបានមើលឃើញសហរដ្ឋអាមេរិកចូលរួមវាយប្រហារមួយរយៈខ្លីលើទីតាំងនុយក្លេអ៊ែរអ៊ីរ៉ង់៕