សហរដ្ឋអាមេរិក កំពុងស្វែងរកការពង្រីកវត្តមានយោធារបស់ខ្លួន នៅក្នុងតំបន់វាលខ្សាច់កណ្តាលរបស់ប្រទេសស៊ីរី ដោយគ្រប់គ្រងអាកាសយានដ្ឋានជាច្រើន និងបង្កើតមូលដ្ឋានថ្មី ក្រោមការត្រួតពិនិត្យពេញលេញរបស់ប្រទេសនេះ។ នេះបើយោងតាមរបាយការណ៍មួយដែលចេញផ្សាយកាលពីថ្ងៃព្រហស្បតិ៍ដោយអង្គការឃ្លាំមើលសិទ្ធិមនុស្សស៊ីរី។

របាយការណ៍នេះ បានឲ្យដឹងថា ការសម្រេចនេះ គឺជាផ្នែកមួយនៃកិច្ចខិតខំប្រឹងប្រែងដ៏ទូលំទូលាយរបស់ទីក្រុងវ៉ាស៊ីនតោន ដើម្បីពង្រឹងមូលដ្ឋានយោធារបស់ខ្លួន នៅក្នុងតំបន់វាលខ្សាច់របស់ប្រទេសស៊ីរី ដែលត្រូវបានគេស្គាល់ថា Badiya និងធានាសុវត្ថិភាពទីតាំងសំខាន់ៗជាយុទ្ធសាស្ត្រ នៅទូទាំងតំបន់នេះ។ របាយការណ៍នេះ បានបញ្ជាក់ថា គំនិតផ្តួចផ្តើមនេះ មានគោលបំណងជំរុញសមត្ថភាពប្រតិបត្តិការ ការពារដឹកជញ្ជូន និងពង្រឹងឥទ្ធិពលនៅជិតតំបន់ដែលសម្បូរទៅដោយប្រេង និងឧស្ម័ន។

យោងតាមរបាយការណ៍ កងកម្លាំងចម្រុះដឹកនាំដោយសហរដ្ឋអាមេរិកមកពីមូលដ្ឋាន al-Tanf ថ្មីៗនេះបានត្រួតពិនិត្យអាកាសយានដ្ឋានយោធា al-Seen នៅភាគឦសាននៃទីក្រុងដាម៉ាស ដើម្បីវាយតម្លៃពីភាពសមស្របរបស់វាសម្រាប់ប្រតិបត្តិការ។ ដំណើរទស្សនកិច្ចនេះ ត្រូវបានធ្វើឡើងជាមួយអង្គភាពមកពីកងកម្លាំងសន្តិសុខ នៅវាលខ្សាច់ Badiya ដែលបច្ចុប្បន្ន សម្របសម្រួលជាមួយកងកម្លាំងចម្រុះ ក្រោមការរៀបចំសន្តិសុខរួមគ្នា។

អង្គការឃ្លាំមើលនេះ ក៏បានលើកឡើងពីការសាងសង់មូលដ្ឋានថ្មីមួយរបស់ក្រុមចម្រុះ នៅជិតព្រំដែនស៊ីរី-អ៊ីរ៉ាក់-ហ្ស៊កដានី និងសកម្មភាពយោធារបស់សហរដ្ឋអាមេរិក កើនឡើងនៅជុំវិញទីក្រុង Palmyra ដែលបង្ហាញថា ទីក្រុងវ៉ាស៊ីនតោនអាចនឹងកំពុងរៀបចំមូលដ្ឋានបន្ថែម នៅក្នុងតំបន់នោះ។

ពុំមានការអត្ថាធិប្បាយជាផ្លូវការណាមួយ ត្រូវបានធ្វើឡើងនៅក្នុងទីក្រុងដាម៉ាស ទាក់ទងនឹងការវិវត្តទាំងនេះទេ៕