អង្គការសហប្រជាជាតិ (UN) បាននិយាយកាលពីថ្ងៃព្រហស្បតិ៍ (៦ វិច្ឆិកា) ថា អាជ្ញាធរអ៊ីស្រាអែល បានច្រានចោលសំណើជាង ១០០លើក ក្នុងការនាំយកសម្ភារៈជំនួយ និងសម្រាលបន្ទុក ទៅកាន់តំបន់ហ្កាហ្សា ចាប់តាំងពីបទឈប់បាញ់បានចាប់ផ្តើមជិត ១ខែមុនមក។

អ្នកនាំពាក្យ លោក Farhan Haq បាននិយាយក្នុងសន្និសីទសារព័ត៌មានកាលពីថ្ងៃព្រហស្បតិ៍ថា៖ ដៃគូរបស់ UN រាយការណ៍ថា ចាប់តាំងពីបទឈប់បាញ់នៅថ្ងៃទី១០ ខែតុលា មក អាជ្ញាធរអ៊ីស្រាអែលបានបដិសេធសំណើចំនួន ១០៧ដងមកហើយ នៃគ្រឿងជំនួយ រួមទាំងភួយ សម្លៀកបំពាក់រដូវរងា ឧបករណ៍និងសម្ភារៈសម្រាប់ថែទាំ និងដំណើរការសេវាទឹកស្អាត និងអនាម័យ។

លោក Haq បន្តថា ស្ទើរតែ ៩០% នៃសំណើដែលត្រូវបដិសេធ បានមកពីអង្គការមិនមែនរដ្ឋាភិបាល ទាំងក្នុងស្រុក និងអន្តរជាតិជាង ៣០ស្ថាប័ន។ អ្នកនាំពាក្យរូបនេះបានលើកឡើងពីការវាយប្រហារកំពុងបន្តរបស់អ៊ីស្រាអែល នៅជិតអ្វីដែលគេហៅថា "បន្ទាត់ពណ៌លឿង" ដែលបណ្តាលឱ្យមានអ្នកស្លាប់និងរបួស ហើយសង្កត់ធ្ងន់ថា "សកម្មភាពយោធាទាំងនេះធ្វើឱ្យជនស៊ីវិល រួមទាំងបុគ្គលិកជំនួយ ជួបហានិភ័យ"។

ទាក់ទងនឹងបម្លាស់ទីរបស់ជនស៊ីវិលនៅទូទាំងតំបន់ហ្កាហ្សា លោក Haq បានរាយការណ៍ថា "មនុស្សជាង ៦៨ម៉ឺននាក់ ធ្វើដំណើរពីភាគខាងត្បូង ទៅកាន់ភាគខាងជើងហ្កាហ្សា ចាប់តាំងពីការចាប់ផ្តើមនៃបទឈប់បាញ់មក ខណៈមនុស្សជិត ១១៣.០០០នាក់ ផ្លាស់ទីពីភាគខាងលិចទៅកាន់ភាគខាងកើតទីក្រុង Khan Younis នៃដែនដីហ៊ុមព័ទ្ធនេះ៕