សេចក្តីរាយការណ៍របស់ប្រព័ន្ធផ្សព្វផ្សាយរដ្ឋ នៅថ្ងៃសុក្រ (៧ វិច្ឆិកា) នេះបានឱ្យដឹងថា ប្រទេសចិន បានបញ្ជូននាវាផ្ទុកយន្តហោះដ៏ទំនើប ដែលរចនាបថតាមជនជាតិដើមដំបូងបំផុតរបស់ខ្លួន ឱ្យចូលបម្រើការជាផ្លូវការហើយបន្ទាប់ពីការសាកល្បងនៅសមុទ្រអស់ជាច្រើនខែ នោះគឺនាវាផ្ទុកយន្តហោះ ហ្វ៊ូជាន (Fujian) ដែលដាក់ឈ្មោះតាមខេត្តហ្វ៊ូជាន ទល់មុខកោះតៃវ៉ាន់ ឆ្លងកាត់ច្រកសមុទ្រដ៏តូចចង្អៀត។

ទីភ្នាក់ងារព័ត៌មានចិន ស៊ិនហួរ បានរាយការណ៍ថា លោកប្រធានាធិបតី Xi Jinping បានចូលរួមពិធីដាក់ដំណើរការ និងដោតទង់ជាតិនៃនាវាហ្វ៊ូជាននេះ នៅក្នុងខេត្ត ហៃណាន កាលពីថ្ងៃពុធសប្ដាហ៍នេះ ហើយលោកក៏បានឡើងលើនាវាដើម្បីត្រួតពិនិត្យផងដែរ។

ហ្វ៊ូជាន គឺជានាវាផ្ទុកយន្តហោះទី៣ របស់ចិន ដែលមានផ្ទៃហោះហើររាបស្មើ និងបំពាក់ដោយប្រព័ន្ធអេឡិចត្រុងសម្រាប់ការហោះឡើង ដោយធ្វើឱ្យនាវានេះក្លាយជាយានកងទ័ពជើងទឹកដែលមានសក្តានុពលខ្លាំងក្លាជាងនាវាផ្ទុកយន្តហោះពីរដំបូង ដែលរចនាដោយរុស្ស៊ី។

ហ្វ៊ូជាន នឹងអាចផ្ទុកយន្តហោះចម្បាំង ដែលបំពាក់អាវុធកាន់តែច្រើន និងធុនធ្ងន់ ជាងនាវាផ្ទុកយន្តហោះ ឡាវនីង (Liaoning) និង សានតុង (Shandong) ដែលមានទំហំតូចជាងបន្តិច ហើយពឹងផ្អែកលើផ្លូវជម្រាលដើម្បីឱ្យយន្តហោះ ហោះឡើងបាន។ នៅក្នុងការសាកល្បងលើសមុទ្រមុនពេលចាប់ផ្តើមប្រតិបត្តិការ — កងទ័ពជើងទឹកចិន បានប្រើនាវាហ្វ៊ូជាននេះ ដើម្បីហោះហើរយន្តហោះចម្បាំងបំបាំងកាយ J-35 ជំនាន់ថ្មីរបស់ខ្លួន និងយន្តហោះចាប់សញ្ញាព្រមានជាមុន KJ-600 ក៏ដូចជាប្រភេទយន្តហោះចម្បាំង J-15 ដែលទើបបង្កើតថ្មីផងដែរ៕