អង្គការអន្តរជាតិ ដែលកំពុងប្រតិបត្តិការនៅស៊ូដង់ បាននិយាយកាលពីថ្ងៃព្រហស្បតិ៍ (៦ វិច្ឆិកា) ថា ប្រជាជន ជាពិសេសកុមារមួយចំនួន ដែលភៀសខ្លួនចេញពីទីក្រុង al-Fashir នៃប្រទេសស៊ូដង់ បានទៅដល់ជំរំមនុស្សធម៌នៅភាគខាងជើងតំបន់ Darfur ក្នុងស្ថានភាពយ៉ាងត្រដាបត្រួសបំផុតនៃកង្វះអាហារូបត្ថម្ភធ្ងន់ធ្ងរ ហើយបើទោះបីជាមានការព្យាបាល ក៏ប្រហែលជាមិនអាចជួយសង្គ្រោះពួកគេបានដែរ។

លោកស្រី Mathilde Vu មកពីក្រុមប្រឹក្សាជនភៀសខ្លួនន័រវេស (NRC) បានពណ៌នាអំពីការធ្វើដំណើរដ៏លំបាកពីទីក្រុង al-Fashir ដែលជាក្រុងធំបំផុតរបស់តំបន់ Darfur ឆ្ពោះទៅកាន់ជំរំ Tawila ដោយនិយាយថា "មនុស្សដែលទៅដល់ជំរំ បានខ្សោះជាតិទឹកខ្លាំងពេក រហូតដល់មិនអាចនិយាយស្ដីបាន"។

លោកស្រីបន្តថា មនុស្សមួយចំនួនបានរួចជីវិតពីសត្វកំណាច និងទឹកភ្លៀង ហើយការឆ្លើយតបផ្នែកមនុស្សធម៌ដែលកំពុងយ៉ាប់យ៉ឺនរួចទៅហើយ អាចមិនគ្រប់គ្រាន់ក្នុងការជួយសង្គ្រោះកុមារទាំងអស់ដែលរត់ចេញពីការឡោមព័ទ្ធ និងភាពអត់ឃ្លានក្នុងភ្លើងសង្គ្រាមបានទេ។

ចាប់តាំងពីក្រុង al-Fashir ត្រូវកងកម្លាំងគាំទ្ររហ័សយោធាប៉ារ៉ា (RSF) ដណ្ដើមកាន់កាប់កាលពី ២សប្តាហ៍មុនមក មានមនុស្សរហូតដល់ ១ម៉ឺននាក់ បានទៅដល់ជំរំក្នុងភូមិ Tawila ។ បុគ្គលិក NRC របស់អង្គការសហប្រជាជាតិ បានឱ្យដឹងថា មនុស្សប្រហែល ៨២.០០០នាក់ បានភៀសខ្លួនចេញពីទីក្រុង al-Fashir និងតំបន់ជុំវិញនោះ ចាប់តាំងពីថ្ងៃទី២៦ ខែតុលា ខណៈមនុស្សរាប់ពាន់នាក់ទៀត នៅតែជាប់គាំងក្នុងការឡោមព័ទ្ធ៕