ប្រជាជនឥណ្ឌា បាននិយាយនៅថ្ងៃសុក្រ (៧ វិច្ឆិកា) នេះថា វិបត្តិបំពុលខ្យល់ ដែលកំពុងបន្តយ៉ាងរឹងរូសនៅក្នុងទីក្រុងញូវដែលី បានធ្វើឱ្យពួកគេប្រឈមគ្រោះថ្នាក់ដល់សុខភាព ហើយបានជំរុញឱ្យអាជ្ញាធរចាត់វិធានការឱ្យឆាប់រហ័ស ខណៈគុណភាពខ្យល់ (AQI) ដាំក្បាលចុះដល់កម្រិតគ្រោះថ្នាក់ខ្លាំង។

ប្រព័ន្ធគ្រប់គ្រងគុណភាពខ្យល់ ព្យាករអាកាសធាតុ និងស្រាវជ្រាវ (SAFAR) ដែលគ្រប់គ្រងដោយរដ្ឋាភិបាលឥណ្ឌា បានវាស់វែងសន្ទស្សន៍គុណភាពខ្យល់ AQI នៅកម្រិត ៣១២ ក្នុងថ្ងៃសុក្រនេះ ដែលធ្វើឱ្យរដ្ឋធានីញូវដែលី ក្លាយជាតំបន់ទីក្រុងមានការបំពុលខ្លាំងបំផុតមួយលើពិភពលោក។

អ្នកស្រុកនិយាយថា៖ ដោយសារភាគល្អិតខ្យល់បរិសុទ្ធត្រូវកាត់បន្ថយ កម្រិតនៃការមើលឃើញក៏ធ្លាក់ទាប ហើយអ្នកស្រុកជួបការលំបាកនៅពេលធ្វើដំណើរ និងដកដង្ហើម ចំណែកការបំពុលខ្យល់គឺខ្ពស់ខ្លាំងណាស់ ដែលអាជ្ញាធរត្រូវតែដោះស្រាយជាបន្ទាន់។

រដ្ឋធានីឥណ្ឌា និងស្រុកដែលនៅជិតនោះ ងាយនឹងទទួលរងនូវផ្សែងអ័ព្ទដ៏ក្រាស់ឃ្មឹកជារៀងរាល់រដូវរងា ដោយសារខ្យល់ត្រជាក់បានហ៊ុមព័ទ្ធធូលីសំណង់លើបរិយាកាស បូករួមនឹងការបំភាយឧស្ម័នពុលពីយានយន្ត និងផ្សែងពីចំហេះកសិកម្ម ដោយធ្វើឱ្យអ្នកស្រុក ២០លាននាក់ របស់ទីក្រុងដែលី ជួបបញ្ហាជំងឺផ្លូវដង្ហើមយ៉ាងគ្រោះថ្នាក់៕