ទីភ្នាក់ងារអាកាសចរណ៍ស៊ីវិល LFV បានឲ្យដឹងថា ចរាចរណ៍ត្រូវបានបញ្ឈប់ នៅឯអាកាសយានដ្ឋានLandvetter របស់ទីក្រុង Gothenburg នៅតំបន់ឆ្នេរភាគខាងលិចនៃប្រទេសស៊ុយអែត កាលពីថ្ងៃព្រហស្បតិ៍ (ទី៦ ខែវិច្ឆិកា) បន្ទាប់ពីយានដ្រូន ១គ្រឿង ឬច្រើនគ្រឿង ត្រូវបានប្រទះឃើញបង្ហោះនៅឯអាកាសយានដ្ឋាននោះ។

អ្នកនាំពាក្យ LFV បាននិយាយថា៖ «យានដ្រូន ១គ្រឿង ឬច្រើនគ្រឿង ត្រូវបានប្រទះឃើញនៅអាកាសយានដ្ឋាន Landvetter នៅមុនម៉ោង ៦ល្ងាច ម៉ោងក្នុងស្រុក (ត្រូវនឹងម៉ោង ១៧ ម៉ោងសកល)។ មានការផ្អាកចរាចរណ៍ ប៉ុន្តែខ្ញុំមិនដឹងថា រយៈពេលយូរប៉ុនណានោះទេ»។

ចំណែកអ្នកនាំពាក្យនគរបាល បានឲ្យដឹងថា នគរបាលបានទទួលការរាយការណ៍ពីការប្រទះឃើញដ៏គួរឲ្យសង្ស័យ នៅវេលាម៉ោង ១៦:៤១នាទី ម៉ោងក្នុងស្រុក ហើយកំពុងនៅកន្លែងកើតហេតុ ដើម្បីប្រមូលព័ត៌មាន។ យោងតាមប្រតិបត្តិករអាកាសយានដ្ឋាន Swedavia បានឲ្យដឹងថា អាកាសយានដ្ឋាននេះគឺធំជាងគេទី២ របស់ប្រទេសស៊ុយអែត បន្ទាប់ពីអាកាសយានដ្ឋាន Arlanda របស់ទីក្រុង Stockholm។

ប្រធានផ្នែកប្រតិបត្តិការរបស់ Swedavia លោកស្រី Susanne Norman បាននិយាយថា៖ «ដែនអាកាសរបស់អាកាសយានដ្ឋាន Landvetter បច្ចុប្បន្នត្រូវបានបិទដោយសារតែការចង្អុលបង្ហាញ អំពីយានដ្រូនដ៏គួរឲ្យសង្ស័យ»។ លោកស្រីបានបញ្ជាក់បន្ថែមថា៖ «ផ្លូវអាកាសនេះនឹងនៅតែបិទដដែល ខណៈពេលដែលនគរបាលកំពុងស៊ើបអង្កេត»។

គួរបញ្ជាក់ថា យានដ្រូនបានបង្កការរំខានយ៉ាងខ្លាំងនៅទូទាំងទ្វីបអឺរ៉ុប ក្នុងរយៈពេលប៉ុន្មានខែថ្មីៗនេះ ដោយបង្ខំឲ្យអាកាសយានដ្ឋានត្រូវបិទបណ្តោះអាសន្នក្នុងប្រទេសមួយចំនួន។ មន្ត្រីមួយចំនួន បានចាត់ទុកថា ឧបទ្ទវហេតុនេះ គឺជាសង្គ្រាមកូនកាត់របស់រុស្ស៊ី។ ទីក្រុងម៉ូស្គូបានបដិសេធមិនមានការពាក់ព័ន្ធណាមួយឡើយទៅនឹងហេតុការណ៍ទាំងនោះ៕