វាមានរយៈពេល ៨០ឆ្នាំហើយ គិតចាប់តាំងពីសហរដ្ឋអាមេរិក បានទម្លាក់គ្រាប់បែកបរមាណូទៅលើទីក្រុង Hiroshima និង Nagasaki របស់ប្រទេសជប៉ុន ដែលជាការប្រើប្រាស់អាវុធនុយក្លេអ៊ែរតែមួយលើកគត់ នៅក្នុងសង្គ្រាម។ ហើយវាក៏មានរយៈពេលជាង ៣ទស្សវត្សរ៍មកហើយ ចាប់តាំងពីការសាកល្បងនុយក្លេអ៊ែរដ៏ធំចុងក្រោយបង្អស់របស់ពិភពលោក ដែលជាការបញ្ចប់នូវយុគសម័យនៃការបំផ្ទុះទ្រង់ទ្រាយធំ ដោយវាបាននាំទៅរកវិធីសាស្រ្តថ្មីមួយដែលប្រទេសនានាសាកល្បងអាវុធនុយក្លេអ៊ែរដោយប្រើប្រព័ន្ធកុំព្យូទ័រ និងវិធីសាស្ត្របច្ចេកទេសផ្សេងទៀតជំនួសឲ្យការបំផ្ទុះជាក់ស្ដែង។

ប៉ុន្តែថ្មីៗនេះ អាវុធនុយក្លេអែរបានក្លាយជាចំណុចចាប់អារម្មណ៍ជាសកលឡើងវិញ បន្ទាប់ពីមានការអះអាង ដែលត្រូវបានធ្វើឡើងដោយប្រធានាធិបតីអាមេរិក លោក Donald Trump។ កាលពីសប្តាហ៍មុន លោក Trump បាននិយាយថា សហរដ្ឋអាមេរិកនឹងចាប់ផ្ដើមសាកល្បងនុយក្លេអ៊ែរឡើងវិញ បន្ទាប់ពីបានផ្អាកអស់រយៈពេល ៣៣ឆ្នាំ ជាចំណាត់ការមួយដែលហាក់ដូចជាក្លាយជាសារមួយទៅកាន់មហាអំណាចនុយក្លេអ៊ែរដែលជាគូប្រជែង គឺរុស្ស៊ី និងចិន។ វាមិនច្បាស់ទេថា តើលោកចង់សាកល្បងប្រព័ន្ធសព្វាវុធ ឬពិតជាធ្វើតេស្តដោយបំផ្ទុះជាក់ស្ដែង ជាអ្វីដែលអាមេរិកមិនបានធ្វើតាំងពីឆ្នាំ១៩៩២ មកម៉្លេះ។

នៅទីក្រុងមូស្គូ ប្រធានាធិបតីរុស្ស៊ី លោក Vladimir Putin បានឆ្លើយតបយ៉ាងរហ័សទៅនឹងការណែនាំដ៏គួរឲ្យភ្ញាក់ផ្អើលរបស់លោក Trump ដោយបានបញ្ជាឲ្យមន្ត្រីជាន់ខ្ពស់របស់លោករៀបចំនូវលទ្ធភាពនៃការចាប់ផ្ដើមសាកល្បងនុយក្លេអ៊ែរឡើងវិញជាលើកដំបូង ក្នុងរយៈពេលជាង ៣ទសវត្សរ៍។ 

តែយ៉ាងណាក្ដី លោកបានបញ្ជាក់ថា ប្រទេសរុស្ស៊ីនឹងនៅតែគោរពសន្ធិសញ្ញាហាមឃាត់ការសាកល្បងជាសាកល យ៉ាងហោចណាស់ សម្រាប់ពេលនេះ។ ការហាមប្រាមរបស់ពិភពលោកដែលលោក Putin សំដៅទៅលើ គឺសន្ធិសញ្ញាហាមឃាត់ការសាកល្បងនុយក្លេអ៊ែរគ្រប់ជ្រុងជ្រោយ ឬ CTBT ដែលជាកិច្ចព្រមព្រៀងដ៏សំខាន់ឆ្នាំ១៩៩៦ ដើម្បីហាមឃាត់ការបំផ្ទុះនុយក្លេអ៊ែរទាំងអស់ មិនថា នៅក្រោមដី ក្រោមទឹក ឬក្នុងបរិយាកាស។ 

ប្រសិនបើមហាអំណាចណាមួយ ចាប់ផ្តើមការសាកល្បងនុយក្លេអ៊ែរឡើងវិញ ឥទ្ធិពលនឹងលើសពីការទូតទៅទៀត។ វានឹងធ្វើឲ្យខូចទំនុកចិត្ត លើសន្ធិសញ្ញាហាមប្រាមការសាកល្បង និងធ្វើឲ្យសម្ព័ន្ធមិត្តរបស់សហរដ្ឋអាមេរិកបារម្ភ ដែលនៅតែចងចាំផលប៉ះពាល់ពីកន្លែងសាកល្បងប៉ាស៊ីហ្វិក និងកាហ្សាក់ស្ថាន។ ការធ្វើតេស្តនឹងផ្តល់ឲ្យប្រទេសនានានូវភស្តុតាងនៃអ្វីដែលអាវុធនុយក្លេអ៊ែរថ្មី នឹងប្រតិបត្តិការ និងថា តើអាវុធនុយក្លេអ៊ែរចាស់ៗ នៅតែដំណើរការដែរ ឬអត់។ ប៉ុន្តែការសាកល្បងនេះ ក៏នឹងត្រូវបានរុស្ស៊ី និងចិនមើលឃើញថា ជាការអះអាងដោយចេតនានៃអំណាចយុទ្ធសាស្ត្ររបស់សហរដ្ឋអាមេរិក៕