ជប៉ុននិយាយនៅថ្ងៃសុក្រនេះថា ខ្លួនបានដាក់ការតវ៉ាដ៏ខ្លាំងក្លា ប្រឆាំងនឹងកូរ៉េខាងជើង ជាការឆ្លើយតបនឹងការបាញ់មីស៊ីលចុងក្រោយរបស់ពួកគេ ។ 

 យោងតាមការអះអាងរបស់រដ្ឋាភិបាលជប៉ុន បានឲ្យដឹងថា នៅថ្ងៃសុក្រនេះ កូរ៉េខាងជើង បានបាញ់មីស៊ីលបាលីស្ទិកមួយគ្រាប់ ឆ្ពោះទៅកាន់សមុទ្រជិតតំបនឆ្នេរភាគខាងកើតរបស់ខ្លួន ។

 ប្រសិនបើត្រូវបានបញ្ជាក់ ការបាញ់មីស៊ីលនេះ នឹងក្លាយជាការបាញ់មីស៊ីលបាលីស្ទិកលើកទីពីរហើយ ក្នុងពេលថ្មីៗនេះ បន្ទាប់ការអះអាងរបស់ទីក្រុងព្យុងយ៉ាងពីការសាកល្បងមីស៊ីលបាលីស្ទិកល្បឿនលឿនជាងសំឡេង កាលពីថ្ងៃទី២២ ខែតុលា កន្លងទៅ ពោលគឺមុនពេលដែលកូរ៉េខាងត្បូង ធ្វើជាម្ចាស់ផ្ទះ កិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក APEC និងដំណើរទស្សនកិច្ចរបស់លោកប្រធានាធិបតីអាមេរិក Donald Trump ទៅកាន់កូរ៉េខាងត្បូង ។

 រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីជប៉ុនលោក Minoru Kihara និយាយនៅក្នុងសន្និសីទសារព័ត៌មានថា ជប៉ុនបានដាក់ការតវ៉ាដ៏ខ្លាំងក្លាប្រឆាំងនឹងកូរ៉េខាងជើង តាមរយៈបណ្តាញការទូតនៅទីក្រុងប៉េកាំង ហើយពួកយើងសូមធ្វើការថ្កោលទោសយ៉ាងខ្លាំងក្លាចំពោះការបាញ់មីស៊ីលនេះ ។

 លោកបន្តថា ជប៉ុននឹងធ្វើការយ៉ាងជិតស្និតជាមួយសហរដ្ឋអាមេរិក និងកូរ៉េខាងត្បូង ដើម្បីតាមដានសកម្មភាពញុះញង់បន្ថែមទៀត រួមទាំងការសាកល្បងនុយក្លេអ៊ែររបស់កូរ៉េខាងជើងផងដែរ ។

ក្រសួងការពារជាតិជប៉ុន ក៏បានចេញសេចក្តីថ្លែងការណ៍មួយផងដែរតាមរយៈឆ្មាំល្បាតឆ្នេរ ដោយពួកគេនិយាយថា ខ្លួនពិនិត្យឃើញការបាញ់បង្ហោះនេះ នៅវេលាម៉ោងក្នុងស្រុក ១២:២៧នាទីថ្ងៃត្រង់ ហើយបន្តិចក្រោយមក មីស៊ីលធ្លាក់ចូលក្នុងសមុទ្រនៅម៉ោង ១២:៤៥នាទី ដោយបង្ហាញថា នោះមិនមែនជាមីស៊ីលរយៈចម្ងាយឆ្ងាយទេ ៕