ក្រុមមនុស្សធម៌របស់អង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា អង្គការផ្តល់ជំនួយនៅ រដ្ឋ North Darfur ប្រទេសស៊ូដង់ កំពុងបង្កើនការគាំទ្រសម្រាប់ការកើនឡើងចំនួនប្រជាជនភៀសខ្លួនពីរដ្ឋធានី El Fasher ។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានចាត់ទុកថាជាស្ថានភាពមនុស្សធម៌ដ៏ធ្ងន់ធ្ងរមួយសម្រាប់គ្រួសាររាប់ពាន់ ដែលត្រូវបានជម្លៀសខ្លួនចាប់តាំងពីការចូលកាន់កាប់ទីក្រុង កាលពីថ្ងៃទី២៦ ខែតុលា។

អង្គការ OCHA បាននិយាយថា ភាគច្រើននៃជនភៀសខ្លួនដែលរត់គេចចេញពីអំពើហិង្សាបានធ្វើដំណើរឆ្ពោះទៅទិសខាងលិចប្រហែល៤០គីឡូម៉ែត្រទៅកាន់ទីក្រុង Tawila និងតំបន់ជុំវិញនោះ ដោយជួបប្រទះនូវស្ថានភាពអាក្រក់បំផុត ដូចជាខ្វះអាហារ ទឹកស្អាត ទីជម្រក និងការថែទាំសុខភាព។

ការិយាល័យបាននិយាយបន្ថែមថា នៅក្នុងជំរំជនភៀសខ្លួន Al Omda ក្នុងតំបន់ Tawila តែមួយ អ្នកមកដល់ថ្មីៗជាង៣.០០០នាក់កំពុងត្រូវការជាបន្ទាន់នូវសម្ភារៈជាមូលដ្ឋាន និងជំនួយទីជម្រក រួមមានផ្ទាំងប្លាស្ទិក កន្ទេល និងភួយ ខណៈសីតុណ្ហភាពធ្លាក់ចុះ។ មនុស្សជាច្រើន រួមទាំងអ្នករងរបួស ជនពិការ និងកុមារដែលគ្មានអ្នករួមដំណើរ កំពុងដេកនៅទីចំហរដោយគ្មានអ្វីការពារ ឬអគារអនាម័យ។