អាជ្ញាធរអាកាសយានដ្ឋានរបស់ប្រទេសឥណ្ឌា និងប្រភពដែលដឹងអំពីបញ្ហានេះ នៅថ្ងៃសុក្រ (ទី៧ ខែវិច្ឆិកា) នេះ បានឲ្យដឹងថា ជើងហោះហើរជាង ២០០ជើង ត្រូវបានពន្យារពេលនៅឯអាកាសយានដ្ឋាន ក្នុងទីក្រុង Delhi ដែលជាកន្លែងដ៏មមាញឹកបំផុតមួយរបស់ពិភពលោក បន្ទាប់ពីប្រព័ន្ធផ្ញើសារគ្រប់គ្រងចរាចរណ៍ផ្លូវអាកាសមានបញ្ហាបច្ចេកទេស។

ភាពខុសប្រក្រតីនេះដែលបានពន្យារពេលការចេញដំណើរ សម្រាប់ជើងហោះហើររាប់សិប ក្នុងរយៈពេលជាង ៣០នាទី អាចបង្កឲ្យមានហេតុការណ៍ដូចគ្នា និងការកកស្ទះ នៅអាកាសយានដ្ឋានផ្សេងទៀតក្នុងប្រទេស។

ភាគហ៊ុនរបស់ក្រុមហ៊ុនអាកាសចរណ៍ IndiGo បានធ្លាក់ចុះ ១,៥ភាគរយ បន្ទាប់ពីក្រុមហ៊ុនអាកាសចរណ៍ បានប្រាប់ឲ្យដឹងថា ប្រតិបត្តិការហោះហើររបស់ខ្លួន ត្រូវបានប៉ះពាល់។ ក្រុមហ៊ុនអាកាសចរណ៍ SpiceJet និង Air India ក៏បានព្រមានអំពីការពន្យារពេលផងដែរ។

អាជ្ញាធរអាកាសយានដ្ឋានរបស់ឥណ្ឌា (AAI) បានឲ្យដឹងថា បញ្ហាបច្ចេកទេសនៅក្នុងប្រព័ន្ធប្តូរសារដោយស្វ័យប្រវត្តិ ដែលត្រូវបានប្រើ ដើម្បីបង្កើតផែនការហោះហើរ បានបង្ខំឲ្យអ្នកត្រួតពិនិត្យត្រូវធ្វើវាដោយដៃ ដែលនាំឲ្យមានការពន្យារពេល។ ប្រភពបាននិយាយថា បញ្ហាប្រព័ន្ធនេះ បានចាប់ផ្តើមកើតឡើងនាល្ងាចថ្ងៃព្រហស្បតិ៍តាមពេលវេលាម៉ោងក្នុងស្រុក។

AAI បានលើកឡើងនៅក្នុងការបង្ហោះលើបណ្ដាញសង្គម X ថា៖ «ក្រុមបច្ចេកទេសកំពុងធ្វើការ ដើម្បីស្តារប្រព័ន្ធឡើងវិញ នៅដំណាក់កាលដំបូង»។ តែទីភ្នាក់ងារនេះមិនបានឆ្លើយតបទៅនឹងសំណើបន្ថែម សម្រាប់ការអត្ថាធិប្បាយលើអ្វីដែលបណ្តាលឲ្យមានបញ្ហានោះទេ។ ទូរទស្សន៍ CNN NEWS 18 បានរាយការណ៍ថា អាជ្ញាធរកំពុងស៊ើបអង្កេតថា តើមេរោគលើប្រព័ន្ធកុំព្យូទ័រ អាចជាមូលហេតុដែរ ឬទេ៕