ជប៉ុន និងមូលនិធិកុមារអង្គការសហប្រជាជាតិ បានចុះហត្ថលេខា និងផ្លាស់ប្តូរលិខិតមួយស្តីពី «ផែនការសម្រាប់ការបើកសាលារៀនបឋមសិក្សាឡើងវិញ នៅក្នុងតំបន់ដែលរងផលប៉ះពាល់ដោយជម្លោះ (កិច្ចសហប្រតិបត្តិការយូនីសេហ្វ)» សម្រាប់កិច្ចសហប្រតិបត្តិការហិរញ្ញវត្ថុឥតគិតថ្លៃចំនួន ៧៣៥ លានយ៉េន (៤,៨ លានដុល្លារ) សម្រាប់សាធារណរដ្ឋស៊ូដង់។

ក្រសួងការបរទេសជប៉ុន បានរាយការណ៍ថា លិខិតនេះ ត្រូវបានចុះហត្ថលេខានៅទីក្រុងញូវយ៉កដោយឯកអគ្គរដ្ឋទូតជប៉ុនប្រចាំអង្គការសហប្រជាជាតិ លោក Mikanagi Tomohiro និងលោក Mandeep O’Brien នាយកសកល ផ្នែកភាពជាដៃគូសាធារណៈនៃមូលនិធិកុមារអង្គការសហប្រជាជាតិ។

សាលារៀនទាំងអស់នៅក្នុងប្រទេសស៊ូដង់ ត្រូវបានបិទ ចាប់ពីខែមេសា ឆ្នាំ២០២៣ ដោយសារតែជម្លោះប្រដាប់អាវុធដែលកំពុងបន្ត។ ចាប់តាំងពីពេលនោះមក មានតែសាលារៀនប្រហែល ៣០ ភាគរយប៉ុណ្ណោះដែ លបានបើកឡើងវិញ ហើយគេនិយាយថា កុមារអាយុចូលរៀនប្រហែល ៩០ ភាគរយ មិនបានចូលរៀនទេ។

លើសពីនេះ សាលារៀនដែលអាចបើកឡើងវិញបាន មានសិស្សច្រើនពេក ដោយសារតែការហូរចូលនៃជនភៀសខ្លួនក្នុងស្រុក។

មានកង្វះខាតសម្ភារៈបង្រៀនផងដែរ ហើយសម្ភារៈសំខាន់ៗដូចជាបង្គន់ និងប្រព័ន្ធផ្គត់ផ្គង់ទឹក ត្រូវបានបំផ្លាញ ហើយស្ថានភាពអនាម័យ កាន់តែយ៉ាប់យ៉ឺន។

កិច្ចព្រមព្រៀងនេះ មានគោលបំណងកែលម្អបរិយាកាសសិក្សាសម្រាប់ការបើកសាលាបឋមសិក្សាឡើងវិញ និងពង្រឹងសមត្ថភាពរបស់អ្នកអប់រំ នៅក្នុងរដ្ឋចំនួន ៥ នៅភាគកណ្តាល ភាគខាងកើត និងភាគខាងត្បូងនៃប្រទេសស៊ូដង់ ជាកន្លែងដែលមានសាលារៀនជាច្រើនដែលត្រូវការស្តារឡើងវិញ ដោយសារតែការខូចខាតដោយផ្ទាល់ពីការប្រយុទ្ធ និងការទទួលយកជនភៀសខ្លួនក្នុងស្រុក៕