កងកម្លាំងបណ្តោះអាសន្នរបស់អង្គការសហប្រជាជាតិនៅប្រទេសលីបង់ (UNIFIL) បានសម្តែងការព្រួយបារម្ភយ៉ាងខ្លាំង ចំពោះការវាយប្រហារតាមអាកាសរបស់អ៊ីស្រាអែលដែលបានធ្វើឡើង កាលពីថ្ងៃព្រហស្បតិ៍។

UNIFIL បាននិយាយនៅក្នុងសេចក្តីថ្លែងការណ៍មួយថា៖«ការវាយប្រហារតាមអាកាសទាំងនេះ គឺជាការរំលោភបំពានយ៉ាងច្បាស់លាស់លើសេចក្តីសម្រេចលេខ ១៧០១ របស់ក្រុមប្រឹក្សាសន្តិសុខ»។ សេចក្តីថ្លែងការណ៍នេះ បានបន្ថែមថា៖«សកម្មភាពយោធាណាមួយ ជាពិសេសក្នុងទ្រង់ទ្រាយបំផ្លិចបំផ្លាញបែបនេះ គំរាមកំហែងដល់សុវត្ថិភាពរបស់ជនស៊ីវិល និងធ្វើឲ្យប៉ះពាល់ដល់វឌ្ឍនភាព ដែលកំពុងត្រូវបានធ្វើឡើងឆ្ពោះទៅរកដំណោះស្រាយនយោបាយ និងការទូត»។

យោងតាមបេសកកម្មរក្សាសន្តិភាព ការវាយប្រហារទាំងនេះ «បានកើតឡើង នៅពេលដែលកងកម្លាំងប្រដាប់អាវុធលីបង់ កំពុងធ្វើប្រតិបត្តិការ ដើម្បីគ្រប់គ្រងអាវុធ និងហេដ្ឋារចនាសម្ព័ន្ធដែលគ្មានការអនុញ្ញាត នៅក្នុងតំបន់ Litani ភាគខាងត្បូង។

បេសកកម្មនេះ បានអំពាវនាវឲ្យអ៊ីស្រាអែល «បញ្ឈប់ការវាយប្រហារទាំងនេះជាបន្ទាន់» ហើយបានជំរុញឲ្យតួអង្គលីបង់ទំាងអស់ «ចៀសវាងការឆ្លើយតបណាមួយ ដែលអាចធ្វើឲ្យស្ថានការណ៍កាន់តែធ្ងន់ធ្ងរឡើង»៕