ក្រុមមន្រ្តីនិយាយនៅថ្ងៃសុក្រនេះ សំណង់អគារកម្ពស់ ៦០ម៉ែត្រ បានបាក់ អំឡុងពេលការងារកម្ទេចចោលនៅរោងចក្រថាមពលកម្ដៅលែងប្រើ ស្ថិតក្នុងទីក្រុង Ulsan របស់កូរ៉េខាងត្បូង ដោយបានសម្លាប់មនុស្ស ៣នាក់ និងមនុស្ស ២នាក់ទៀត ត្រូវបានគេសន្មត់ថា បានស្លាប់ផងដែរ ។

មនុស្ស ៥នាក់ផ្សេងទៀត បន្តជាប់ខ្លួននៅក្រោមគំនរបាក់បែក រួមទាំងមនុស្ស ២នាក់ ដែលក្រុមមន្រ្តីនិយាយថា ពួកគេនៅមិនទាន់កំណត់ទីកន្លែងដែលពួកគេជាប់ខ្លួននៅឡើយនោះទេ ។

មនុស្ស ៩នាក់ បានធ្វើការនៅកន្លែងកើតហេតុ ពេលដែលប៉មអគារ បានបាក់កាលពីរសៀលថ្ងៃព្រហស្បតិ៍ ។ ក្រុមការងារជួយសង្រ្គោះ បានទាញមនុស្ស ២នាក់ដោយសុវត្ថិភាព ក្រោយការឆ្លើយតបរបស់ពួកគេ ប៉ុន្តែកម្មករម្នាក់ដែលត្រូវបានសង្រ្គោះ ក្រោយមកត្រូវបានគេប្រកាសថា បានស្លាប់នៅក្នុងមន្ទីរពេទ្យនៅព្រឹកថ្ងៃសុក្រនេះ ។ 

រយៈពេលប៉ុន្មានម៉ោងក្រោយមក ពួកគេបានទាញកម្មករម្នាក់ទៀតដែលត្រូវបានគេប្រកាសថា ស្លាប់ ហើយគ្រូពេទ្យនៅកន្លែងកើតហេតុ បានបញ្ជាក់ការស្លាប់របស់កម្មករម្នាក់ទៀត ដែលស្ថិតនៅក្នុងចំណោមមនុស្ស ៣នាក់នៅក្រោមគំនរបាក់បែក ។

លោក Kim Jeong-shik គឺជាមន្រ្តីមកពីនាយកដ្ឋានពន្លត់អគ្គិភ័យក្រុង Ulsan និយាយថា ក្រុមមន្រ្តីពន្លត់អគ្គិភ័យ មានជំនឿថា មនុស្ស ២នាក់ផ្សេងទៀត បានស្លាប់ផងដែរ ។

លោកបន្តថា កម្មករជួយសង្រ្គោះជាង ៣៤០នាក់ និងរថយន្តរាប់សិបគ្រឿង ត្រូវបានបញ្ជូនទៅកាន់កន្លែងកើតហេតុ សម្រាប់កិច្ចខិតខំរុករក និងជួយសង្រ្គោះ ។

ប្រតិបត្តិការរុករកបានផ្អាកបណ្តោះអាសន្ននៅព្រឹកថ្ងៃសុក្រនេះ ដោយសារក្តីបារម្ភពីគំនរបាក់បែកគ្មានស្ថិរភាព ៕