ប្រភពសន្តិសុខដែនសមុទ្រ បានឲ្យដឹងថា នាវាដឹកឧស្ម័នធម្មជាតិរាវ (LNG) បានគេចដោយជោគជ័យពីចោរសមុទ្រ ដែលចូលទៅកៀកនាវាតាមទូកល្បឿនលឿនមួយគ្រឿង នៅម្ដុំឆ្នេររបស់ប្រទេសសូម៉ាលី នាថ្ងៃសុក្រ (ទី៧ ខែវិច្ឆិកា) ដោយធ្វើឲ្យមានក្ដីបារម្ភកាន់តែខ្លាំងឡើង អំពីការកើតឡើងវិញនូវអំពើលួចប្លន់តាមសមុទ្រ ក្រោយស្ងប់ស្ងាត់ជាច្រើនឆ្នាំ។

ការវាយប្រហារប្រដាប់អាវុធជាបន្តបន្ទាប់ នាពេលថ្មីៗនេះ លើនាវានានា នៅក្នុងតំបន់នេះ ដោយរួមទាំងការជាប់ពាក់ព័ន្ធជាលើកដំបូងដែលសង្ស័យថា ជាស្នាដៃរបស់ចោរសមុទ្រសូម៉ាលី ក្នុងមួយឆ្នាំ បានបង្កមានក្ដីបារម្ភ អំពីសុវត្ថិភាពនៃផ្លូវដឹកជញ្ជូនដែលត្រូវបានប្រើ ដើម្បីដឹកជញ្ជូនថាមពល និងទំនិញសំខាន់ៗទៅកាន់ទីផ្សារពិភពលោក។

មន្ត្រីម្នាក់នៃក្រុមហ៊ុនសន្តិសុខដែនសមុទ្រ Diaplous បាននិយាយថា ហេតុការណ៍ នៅថ្ងៃសុក្រនេះ បានកើតឡើងនៅជិតទីតាំងនៃការវាយប្រហារនៅមួយថ្ងៃមុននេះ ដែលដាក់គោលដៅលើនាវាដឹកប្រេង Hellas Aphrodite របស់ប្រទេសម៉ាល់តា។

ក្រុមគ្រប់គ្រងហានិភ័យដែនសមុទ្រអង់គ្លេស Vanguard និងប្រភពសន្តិសុខដែនសមុទ្រ បានបញ្ជាក់ថា នាវាដឹក LNG មានទង់ជាតិប្រទេសប្រជុំកោះ Marshall Islands ដែលប្រភពសន្តិសុខដែនសមុទ្រកំណត់ថា ជា Al Thumama បានរាយការណ៍ពីការចូលទៅកៀកដោយទូកតូចមួយដែលមានមនុស្ស ៣នាក់ជិះនៅលើនោះ។

ប្រភពបានបន្ថែមថា អ្នកគ្រប់គ្រង បានរៀបរាប់ថា នាវាដឹកប្រេងដែលធ្វើដំណើរពីទីក្រុង Ras Laffan របស់ប្រទេសកាតា ទៅកាន់ទីក្រុង Swinoujscie របស់ប៉ូឡូញ កាត់តាម Cape of Good Hope បានទៅហួសពីទូកល្បឿនលឿននោះ៕