ស្របពេលដែលព្យុះស្លាប់មនុស្សច្រើនបំផុតក្នុងឆ្នាំនេះ វាយប្រហារប្រទេសវៀតណាម ក្រោយបង្កភាពវឹកវរនៅប្រទេសហ្វិលីពីននាដើមសប្តាហ៍នេះ ក្រុមអ្នកវិទ្យាសាស្រ្ត បានព្រមានថា ហេតុការណ៍អាកាសធាតុអាក្រក់ អាចនឹងកើតឡើងញឹកញាប់ជាងមុន ស្របពេលដែលសីតុណ្ហភាពសកលកើនឡើង ។

ព្យុះទីហ្វុង Kalmaegi បានសម្លាប់មនុស្ស ១៨៨នាក់ នៅទូទាំងប្រទេសហ្វីលីពីន និងបណ្តាលឲ្យមានការខូចខាតហួសនឹងថ្លែងលើហេដ្ឋរចនាសម្ព័ន្ធ និងដីកសិកម្មនៅទូទាំងប្រជុំកោះនេះ ។ ក្រោយមក ព្យុះមួយនេះ បានបំផ្លិចបំផ្លាញផ្ទះសម្បែងប្រជាពលរដ្ឋ និងរំលើងដើមឈើ ក្រោយបោកបក់ដល់ដីគោកនៅភាគកណ្តាលប្រទេសវៀតណាមកាលពីយប់ថ្ងៃព្រហស្បតិ៍ ។

បន្ទាប់ពីព្យុះទីហ្វុង Kalmaegi ដ៏កំណាច បានវាយប្រហារហ្វីលីពី អាជ្ញាធរមូលដ្ឋានបាននិយាយ ថា ក្រុមព្យាករអាកាសធាតុព្រមានពីព្យុះថ្មីមួយទៀតមានឈ្មោះ Fung-Wong ដែលកំពុងខិតជិតទៅដល់ប្រជុំកោះនេះ ហើយត្រូវរំពឹងថា នឹងវាយប្រហារហ្វីលីពីន នៅយប់ថ្ងៃសុក្រ ឬព្រឹកព្រលឹមថ្ងៃសៅរ៍ ។

លោក Gianmarco Mengaldo គឺជាអ្នកស្រាវជ្រាវនៅសាកលវិទ្យាល័យជាតិសិង្ហបុរី និយាយថា អាកាសធាតុក្តៅជាងមុនបណ្តាលមកពីបម្រែបម្រួលអាកាសធាតុ នឹងធ្វើឲ្យសំណើមកើនឡើងក្នុងបរិយាកាស ដែលនាំឲ្យមានភ្លៀងធ្លាក់ខ្លាំង និងព្យុះកាន់តែច្រើនជាងមុន ។

ការបំផ្លិចបំផ្លាញរបស់ព្យុះ Kalmaegi គាប់ជួននឹងជំនួបរបស់ប្រតិភូមកពីជាង ១៩០ប្រទេស នៅទីក្រុងព្រៃជប់ភ្លៀង Belem របស់ប្រទេសប្រេស៊ីល សម្រាប់ជុំចុងក្រោយនៃកិច្ចប្រជុំអាកាសធាតុ ។

ក្រុមអ្នកស្រាវជ្រាវ និយាយថា បរាជ័យរបស់ក្រុមមេដឹកនាំពិភពលោក ក្នុងការគ្រប់គ្រងការបំភាយឧស្ម័នផ្ទះកញ្ចក់ នឹងនាំឲ្យមានព្យុះកំណាចកើនឡើងច្រើនជាងមុន ៕