​

ក្រុមមន្ត្រីបាននិយាយកាលពីថ្ងៃសុក្រថា មនុស្សយ៉ាងហោចណាស់៥នាក់បានស្លាប់នៅក្នុងប្រទេសវៀតណាម បន្ទាប់ពីព្យុះទីហ្វុង កាល់ម៉េហ្គី(Kalmaegi) បានវាយបោកបក់នៅតំបន់ឆ្នេរ ដោយមានខ្យល់និងភ្លៀងធ្លាក់ខ្លាំង បន្ទាប់ពីព្យុះនេះបានឆ្លងកាត់ប្រទេសហ្វីលីពីន បណ្តាលឲ្យមនុស្សយ៉ាងហោចណាស់១៨៨នាក់ស្លាប់ ១៣៥នាក់បាត់ខ្លួន និង៩៦នាក់ផ្សេងទៀតរងរបួស។ ប្រធានាធិបតីហ្វីលីពីន លោក Ferdinand Marcos Jr. បានទៅពិនិត្យមើលមជ្ឈមណ្ឌលជម្លៀសកាលពីថ្ងៃសុក្រ ដោយបានចែកចាយជំនួយសង្គ្រោះ និងធានាដល់ជនរងគ្រោះពីការបន្តផ្តល់ការគាំទ្ររបស់រដ្ឋាភិបាល ។

ព្យុះទីហ្វុងកាល់ម៉េហ្គី(Kalmaegi) បានបោកបក់ដល់ដីគោកនៅភាគកណ្តាលប្រទេសវៀតណាមកាលពីល្ងាចថ្ងៃព្រហស្បតិ៍ ដោយបានផ្តួលដើមឈើ បំផ្លាញលំនៅឋាន និងបង្កឱ្យមានការដាច់ចរន្តអគ្គិសនី មុនពេលវាចុះខ្សោយទៅវិញ។ អាជ្ញាធរបានព្រមានពីភ្លៀងធ្លាក់ខ្លាំងបន្ថែមទៀតរហូតដល់២០០មីលីម៉ែត្រនៅក្នុងខេត្តភាគកណ្តាល និងបាននិយាយថា ការកើនឡើងកម្រិតទឹកទន្លេ អាចបង្កឱ្យមានទឹកជំនន់ និងបំណាក់ដី។

ព្យុះទីហ្វុងនេះ បានបន្សល់ទុកការបំផ្លិចបំផ្លាញនៅតាមតំបន់ឆ្នេរ ដោយបានផ្តួលរលំដើមឈើ បំបែកកញ្ចក់និងបំផ្លាញដំបូលផ្ទះ ដោយអ្នកស្រុកបានមកប្រមូលផ្តុំគ្នានៅជុំវិញម៉ាស៊ីនភ្លើងដើម្បីបញ្ចូលថ្មទូរស័ព្ទរបស់ពួកគេ។ ទីភ្នាក់ងារគ្រប់គ្រងគ្រោះមហន្តរាយរបស់ប្រទេសវៀតណាមបានរាយការណ៍ពីអ្នករងរបួសចំនួនប្រាំពីរ និងការខូចខាតលំនៅឋានប្រមាណ២.៨០០ខ្នង។ ការដាច់ចរន្តអគ្គិសនី បានធ្វើឲ្យប៉ះពាល់ដល់ប្រជាជនប្រហែល១,៣លាននាក់។