សម្រាប់អ្នករស់នៅក្នុងតំបន់ហ្កាហ្សា លោក Yassir Shaheen រាល់យប់គឺជាការលំបាកបំផុតក្នុងការរស់នៅជាមួយសង្គ្រាមក្នុងរយៈពេលពីរឆ្នាំដ៏បំផ្លិចបំផ្លាញរបស់អ៊ីស្រាអែលនៅតំបន់ហ៊ុមព័ទ្ធមួយនេះ។ លោក បាននិយាយថា «រាល់យប់ យើងដេកមិនលក់ បេះដូងរបស់យើងលោតញាប់ មានអារម្មណ៍ថាដូចជាមេឃកំពុងបាក់រលំមកលើយើង»។

តំបន់ហ្កាហ្សាត្រូវបានពង្រាប សេដ្ឋកិច្ចរបស់តំបន់ត្រូវបានបំផ្លាញ ហេដ្ឋារចនាសម្ព័ន្ធរងការខូចខាត ហើយប្រជាជនតំបន់ត្រូវភៀសខ្លួនចេញ ខណៈបទឈប់បាញ់សម្របសម្រួលដោយសហរដ្ឋអាមេរិកដ៏ផុយស្រួយស្ទើរតែមិនដំណើរការ។ ប្រជាជនប៉ាឡេស្ទីនជាង ៦៨.០០០នាក់ត្រូវបានបញ្ជាក់ថាត្រូវបានសម្លាប់ ហើយប្រហែល ១០.០០០នាក់នៅតែកប់នៅក្រោមគំនរបាក់បែក នេះបើយោងតាមអាជ្ញាធរសុខាភិបាលតំបន់ហ្កាហ្សា។

ខណៈមេដឹកនាំពិភពលោកស្ថិតនៅក្នុងរដ្ឋធានី Doha របស់ប្រទេសកាតា បានសន្យាក្នុងសប្តាហ៍នេះថានឹង «មិនទុកឲ្យនរណាម្នាក់រងទុក្ខលំបាកឡើយ» នៅឯកិច្ចប្រជុំកំពូលពិភពលោកលើកទី២ របស់អង្គការសហប្រជាជាតិសម្រាប់ការអភិវឌ្ឍន៍សង្គម (WSSD) ដែលការប្តេជ្ញាចិត្តនេះគឺផ្ទុយស្រឡះពីការពិតនៅក្នុងហ្កាហ្សា ដែលដំណើរការចំពោះតម្រូវការចាំបាច់ជាមូលដ្ឋាននៅតែត្រូវការបន្ថែម។

កាលពីថ្ងៃព្រហស្បតិ៍សប្តាហ៍នេះ ការិយាល័យប្រព័ន្ធផ្សព្វផ្សាយរដ្ឋាភិបាលតំបន់ហ្កាហ្សា បាននិយាយថា អ៊ីស្រាអែលបានអនុញ្ញាតឱ្យរថយន្តដឹកជំនួយត្រឹមតែ៤.៤៥៣គ្រឿងប៉ុនណ្ណោះចូល ដែលមានត្រឹមភាគបួននៃអ្វីដែលត្រូវបានគេសន្មត់ថានឹងចូលជាប្រចាំថ្ងៃ ដោយយោងទៅតាមកិច្ចព្រមព្រៀងបទឈប់បាញ់ចូលជាធរមានកាលពីថ្ងៃទី១០ ខែតុលា។