មន្ត្រីបាននិយាយថា អគ្គិភ័យឆេះឃ្លាំងទឹកអប់មួយកន្លែង នៅភាគពាយ័ព្យប្រទេសទួរគី នៅព្រឹកថ្ងៃសៅរ៍នេះ បានបណ្តាលឲ្យមនុស្ស ៦នាក់ស្លាប់ និង ម្នាក់ទៀត រងរបួស។

មូលហេតុនៃអគ្គិភ័យនៅខេត្ត Kocaeli មិនទាន់ដឹងភ្លាមៗ នៅឡើយទេ។ ភ្លើងបានឆាបឆេះឡើង នៅម៉ោងប្រហែល ៩ ព្រឹក ម៉ោងក្នុងស្រុក ដោយប្រព័ន្ធផ្សព្វផ្សាយក្នុងស្រុករាយការណ៍ថា អគ្គិភ័យបានឆាបឆេះឡើង ដោយមានផ្ទុះជាច្រើន។ ក្រុមសង្គ្រោះបន្ទាន់ និងអ្នកពន្លត់អគ្គិភ័យ ត្រូវបានបញ្ជូនទៅកន្លែងកើតហេតុភ្លាមៗ ហើយអគ្គីភ័យនេះ ត្រូវបានគ្រប់គ្រង ក្នុងរយៈពេលត្រឹមតែមួយម៉ោង។

ថ្លែងទៅកាន់អ្នកយកព័ត៌មាន អភិបាលខេត្ត លោក Ilhami Aktas បាននិយាយថា មនុស្ស ៦ នាក់ បានស្លាប់ និងម្នាក់ រងរបួស ហើយកំពុងទទួលការព្យាបាល។ លោកបានបន្ថែមថា មូលហេតុនៃអគ្គិភ័យ មិនទាន់ដឹងនៅឡើយទេ ហើយកំពុងស្ថិតក្រោមការស៊ើបអង្កេត៕