យោងតាមការបញ្ជាក់របស់ក្រុមតាលីបង់កាលពីថ្ងៃសៅរ៍ ការចរចាសន្តិភាពរវាងអាហ្វហ្គានីស្ថាន និងប៉ាគីស្ថាន បានបរាជ័យ ទោះបីជាបទឈប់បាញ់រវាងប្រទេសជិតខាងទាំងពីរនៅតែជាធរមានក៏ដោយ។

អ្នកនាំពាក្យតាលីបង់លោក Zabihullah Mujahid បាននិយាយថា ការចរចាបានបរាជ័យ ដោយសារតែទីក្រុង អ៊ីស្លាម៉ាបាដ (Islamabad )ទាមទារឱ្យទីក្រុង កាប៊ុល (Kabul) ទទួលខុសត្រូវចំពោះសន្តិសុខផ្ទៃក្នុងរបស់ប៉ាគីស្ថាន ជាលក្ខខណ្ឌដែលលោកបានហៅថាហួសពីសមត្ថភាពរបស់អាហ្វហ្គានីស្ថាន។

លោក Mujahid បានបន្ថែមថា បទឈប់បាញ់ដែលត្រូវបានបង្កើតឡើងមិនទាន់ត្រូវបានរំលោភបំពានដោយពួកលោកឡើយ រហូតមកដល់ពេលនេះ ហើយពួកលោកនឹងបន្តតាម។

ការដួលរលំនៃការចរចាបានកើតឡើងមួយថ្ងៃបន្ទាប់ពីកងទ័ពអាហ្វហ្គានីស្ថាន និងប៉ាគីស្ថាន បានបាញ់ប្រហារគ្នាតាមបណ្តោយព្រំដែនរួមរបស់ពួកគេ ស្របពេលការបន្តការចរចានៅទីក្រុងអ៊ីស្តង់ប៊ុល ប្រទេសទួរគី។

លោកប្រធានាធិបតីទួរគី Tayyip Erdogan បានជួបជាមួយនាយករដ្ឋមន្ត្រីប៉ាគីស្ថានលោក Shehbaz Sharif នៅទីក្រុងបាគូ (Baku)កាលពីថ្ងៃសៅរ៍ ហើយបានសម្តែងក្តីសង្ឃឹមថា ការពិភាក្សានឹងផ្តល់លទ្ធផលឆ្ពោះទៅរកស្ថិរភាពយូរអង្វែង។ លោកបានបញ្ជាក់ជាថ្មីអំពីការប្តេជ្ញាចិត្តរបស់ប្រទេសទួរគីក្នុងការសម្របសម្រួលការសន្ទនារវាងភាគីទាំងពីរ នេះបើយោងតាមសេចក្តីថ្លែងការណ៍មួយពីការិយាល័យរបស់លោក៕