ទីភ្នាក់ងារដែនសមុទ្រម៉ាឡេស៊ី បាននិយាយកាលពីថ្ងៃអាទិត្យ (៩ វិច្ឆិកា) ថា ទូកមួយគ្រឿងដែលដឹកសមាជិកសហគមន៍រ៉ូហ៊ីងយ៉ា មកពីសហភាពមីយ៉ាន់ម៉ា បានលិចនៅជិតព្រំដែនសមុទ្ររវាងថៃ-ម៉ាឡេស៊ី ដោយមនុស្សរាប់រយនាក់នៅតែបាត់ខ្លួន ហើយយ៉ាងតិច ៧នាក់ បានស្លាប់ និងមនុស្ស ១៣នាក់ ត្រូវបានជួយសង្គ្រោះរហូតមកទល់ពេលនេះ។

ប្រធានទីភ្នាក់ងារដែនសមុទ្រប្រចាំតំបន់របស់ម៉ាឡេស៊ី លោក Romli Mustafa បាននិយាយថា ក្រុមអ្នកជួយសង្រ្គោះបានប្រតិបត្តិការស្វែងរកលើផ្ទៃសមុទ្រទំហំ ១៧០ម៉ាយល៍ណត់ក្រឡា នៅជិតកោះ Langkawi កាលពីថ្ងៃសៅរ៍កន្លងទៅ បន្ទាប់ពីកប៉ាល់ធំមួយគ្រឿងដែលដឹកមនុស្ស ៣០០នាក់ បានចាកចេញពីរដ្ឋរ៉ាឃីន របស់មីយ៉ាន់ម៉ា កាលពីរយៈពេល ៣ថ្ងៃមុននោះ។

ប្រព័ន្ធផ្សព្វផ្សាយរដ្ឋ Bernama របស់ម៉ាឡេស៊ី បានដកស្រង់សម្តីប្រមុខនគរបាលខេត្ត Kedah លោក Adzli Abu Shah ដោយនិយាយថា ដំបូងឡើយ មនុស្សទាំងអស់នោះបានជិះលើកប៉ាល់ធំមួយនេះពីមីយ៉ាន់ម៉ា ប៉ុន្តែក៏ត្រូវផ្ទេរទៅទូកតូចៗចំនួន ៣គ្រឿង ដែលនីមួយៗមានផ្ទុកមនុស្សប្រហែល ១០០នាក់ ដើម្បីជៀសវាងការប្រទះឃើញ នៅពេលជិះទៅជិតម៉ាឡេស៊ី។ ក្រៅពីទូក ១គ្រឿងក្នុងចំណោមនោះបានលិច លោក Shah បន្តថា ស្ថានភាពទូកពីរគ្រឿងទៀតមិនដឹងថាយ៉ាងម៉េចហើយនោះទេ ខណៈប្រតិបត្តិការស្វែងរក និងជួយសង្គ្រោះកំពុងបន្ត។

រដ្ឋរ៉ាឃីន ដ៏ក្រីក្ររបស់មីយ៉ាន់ម៉ា បានរងគ្រោះដោយជម្លោះអស់ជាច្រើនឆ្នាំ ភាពអត់ឃ្លាន និងអំពើហិង្សាជនជាតិភាគតិច ដែលភាគច្រើនផ្តោតលើសហគមន៍ជនជាតិភាគតិចមូស្លីមរ៉ូហ៊ីងយ៉ា។ ដោយប្រឈមនឹងអំពើហិង្សានៅមីយ៉ាន់ម៉ា និងស្ថានភាពរស់នៅកាន់តែលំបាកនៅជំរំបង់ក្លាដែស ជនជាតិរ៉ូហ៊ីងយ៉ាមកពីប្រទេសទាំងពីរនេះតែងតែព្យាយាមធ្វើដំណើរប្រកបដោយគ្រោះថ្នាក់តាមសមុទ្រ ទៅកាន់ប្រទេសជិតខាង រួមទាំងម៉ាឡេស៊ីផងដែរ៕