ប្រជាជនអ៊ុយក្រែនរាប់លាននាក់កំពុងស៊ូទ្រាំនឹងសីតុណ្ហភាពត្រជាក់ និងភាពងងឹត បន្ទាប់ពីរលកនៃការវាយប្រហាររបស់រុស្ស៊ីលើរោងចក្រថាមពល បានបណ្តាលឱ្យមានការដាច់ចរន្តអគ្គិសនីយ៉ាងទូលំទូលាយនៅទូទាំងប្រទេស។

កងទ័ពអាកាសអ៊ុយក្រែនបាននិយាយថា រុស្ស៊ីបានបាញ់យានដ្រូនចំនួន ៤៥៨ គ្រឿង និងមីស៊ីលចំនួន ៤៥ គ្រាប់ទៅលើប្រទេសអ៊ុយក្រែនកាលពីយប់ជ្រៅថ្ងៃសៅរ៍ ដោយបន្ថែមថា ខ្លួនបានបាញ់ទម្លាក់យានដ្រូនចំនួន ៤០៦ គ្រឿង និងមីស៊ីលចំនួន ៩ គ្រាប់។   អាជ្ញាធរអ៊ុយក្រែនបានព្រមានថា ទ្រង់ទ្រាយធំនៃការខូចខាតមានន័យថា វានឹងត្រូវការពេលវេលាដើម្បីស្តារលំហូរថាមពលឡើងវិញ។ ការផ្គត់ផ្គង់អគ្គិសនីនៅទូទាំងប្រទេសកំពុងត្រូវបានបែងចែក ដោយប្រជាជននៅក្នុងរដ្ឋធានីគីវ ( Kyiv) នឹងគ្មានអគ្គិសនីរយៈពេល១០ទៅ១២ ម៉ោងនៅថ្ងៃអាទិត្យ នេះបើយោងតាមកាលវិភាគដែលបានចេញផ្សាយដោយក្រុមហ៊ុនថាមពល។

យោងតាមអាជ្ញាធរមូលដ្ឋានអ៊ុយក្រែន យ៉ាងហោចណាស់ជនស៊ីវិល១៥ នាក់ត្រូវបានសម្លាប់ដោយការវាយប្រហាររបស់រុស្ស៊ីកាលពីចុងសប្តាហ៍ ។

លោកស្រី Svitlana Grynchuk រដ្ឋមន្ត្រីក្រសួងថាមពលអ៊ុយក្រែន បាននិយាយថា ការវាយប្រហារកាលពីថ្ងៃសៅរ៍គឺជាការវាយប្រហារដោយផ្ទាល់ដ៏ធំបំផុតមួយក្នុងចំណោមការវាយប្រហារជាច្រើនលើរោងចក្រថាមពល ចាប់តាំងពីការចាប់ផ្តើមសង្គ្រាម។

លោកស្រីនិយាយថា ការដាច់ចរន្តអគ្គិសនីភ្លាមៗត្រូវបានអនុវត្តនៅទូទាំងតំបន់ស្ទើរតែទាំងអស់ ដើម្បីធ្វើឱ្យបណ្តាញមានស្ថេរភាព ហើយបន្ទាប់មកក្រុមការងារ បានប្តូរទៅការផ្ដាច់ចរន្តអគ្គិសនីជារៀងរាល់ម៉ោង ដើម្បីឱ្យអ្នកប្រើប្រាស់អាចរៀបចំផែនការសកម្មភាពរបស់ពួកគេបានកាន់តែងាយស្រួលជុំវិញការដាច់ចរន្តអគ្គិសនី៕