ព្យុះទីហ្វុង Fung-Wong ត្រូវបានគេព្យាករណ៍ថានឹងបោកបក់ឆ្ពោះទៅកាន់កោះតៃវ៉ាន់ បន្ទាប់ពីព្យុះដ៏ខ្លាំងក្លានេះបានវាយប្រហារភាគឦសានប្រទេសហ្វីលីពីនកាលពីយប់ថ្ងៃអាទិត្យ ៩ វិច្ឆិកា ដែលបណ្តាលឱ្យមានទឹកជំនន់យ៉ាងទូលំទូលាយ និងការផ្អាកប្រតិបត្តិការរបស់រដ្ឋាភិបាល។

យោងតាមការជូនដំណឹងពីការិយាល័យអាកាសធាតុក្នុងស្រុក ព្យុះ ដែលត្រូវបានគេស្គាល់ក្នុងស្រុកថា Uwan ឥឡូវនេះបានបោកបក់លើសមុទ្រហ្វីលីពីនខាងលិច ហើយកំពុងមានខ្យល់បក់បោកអតិបរមា ១៥០គីឡូម៉ែត្រក្នុងមួយម៉ោង។ ព្យុះទីហ្វុងនេះ ត្រូវបានគេរំពឹងថានឹងបោកបក់នៅភាគខាងជើងកោះតៃវ៉ាន់នៅសប្តាហ៍នេះ។  

ព្យុះទីហ្វុង Fung-Wong បានបោះពួយចេញពីប្រទេសហ្វីលីពីនហើយ ក្រោយបោកបក់លើ ទីក្រុង    Dinalungan របស់ខេត្ត Aurora លើកោះ Luzon ។ អនុប្រធានមជ្ឈមណ្ឌលប្រតិបត្តិការពារជនស៊ីវិលលោក Bernardo Rafaelito Alejandro បាននិយាយនៅថ្ងៃចន្ទនេះ ថា ផ្ទះប្រហែល ១.០០០ខ្នង ត្រូវបានខូចខាត បន្ទាប់ពីភូមិចំនួន១២២ ត្រូវបានទឹកជន់លិច។ មនុស្សប្រហែល ១,៤ លាននាក់ត្រូវបានជម្លៀសចេញជាមុនជាការបង្ការ។ 

មជ្ឈមណ្ឌលព្រមានព្យុះទីហ្វុងរួមរបស់សហរដ្ឋអាមេរិកបាននិយាយថា ព្យុះទីហ្វុងនេះត្រូវគេព្យាករណ៍ថានឹងវាយប្រហារកោះតៃវ៉ាន់ជាប្រព័ន្ធខ្សោយ នៅសប្តាហ៍នេះ។ យោងតាមការិយាល័យអាកាសធាតុហ្វីលីពីន ព្យុះនេះបច្ចុប្បន្នស្ថិតនៅចម្ងាយ ១២៥ គីឡូម៉ែត្រ ភាគពាយ័ព្យនៃទីក្រុង Bacnotan របស់ប្រទេសហ្វីលីពីន ៕