ទីភ្នាក់ងារពន្ធនាគាររបស់អេក្វាឌ័រ បាននិយាយថា កុបកម្មដោយហិង្សារយៈពេលពេញ ១ថ្ងៃ ក្នុងពន្ធនាគារមួយនៅភាគនិរតីនៃប្រទេសនេះ កាលពីថ្ងៃអាទិត្យ (៩ វិច្ឆិកា) បានបណ្តាលឱ្យអ្នកទោសយ៉ាងហោចណាស់ ៣១នាក់ បានស្លាប់។

នៅព្រឹកថ្ងៃអាទិត្យ ទីភ្នាក់ងារពន្ធនាគារ SNAI បានរាយការណ៍ពីការស្លាប់ចំនួន ៤នាក់ នៅពន្ធនាគារ ក្នុងឧប្បត្តិហេតុដាច់ដោយឡែកមួយ ហើយសេចក្តីថ្លែងការណ៍និយាយថា កុបកម្មនោះកើតឡើងដោយសារការរៀបចំឡើងវិញនូវអ្នកទោស ដាក់ទៅក្នុងទីតាំងមានសន្តិសុខអតិបរមាថ្មីមួយ។

ក្រោយមកទៀត សេចក្តីថ្លែងការណ៍ដែលចែករំលែកនៅលើបណ្ដាញសង្គម X ដោយទីភ្នាក់ងារ SNAI បានឱ្យដឹងថា អ្នកទោសចំនួន ២៧នាក់បន្ថែមទៀត នៅទីប្រជុំជនកំពង់ផែ Machala ភាគខាងត្បូងនៃទីក្រុង Guayaquil បានស្លាប់។

ក្នុងប៉ុន្មានឆ្នាំថ្មីៗនេះ ប្រទេសអេក្វាឌ័រ បានប្រឈមមុខនឹងរលកនៃកុបកម្មក្នុងពន្ធនាគារដ៏ហិង្សា ដែលបណ្តាលឱ្យអ្នកទោសរាប់រយនាក់ស្លាប់។ រដ្ឋបាលរបស់លោកប្រធានាធិបតី Daniel Noboa ដែលសន្យាថានឹងប្រកាន់ជំហរតឹងរ៉ឹងលើឧក្រិដ្ឋកម្ម បានស្តីបន្ទោសអំពើហិង្សានេះទៅលើក្រុមជនអន្ធពាលគូប្រជែង ដែលកំពុងប្រយុទ្ធដណ្ដើមអំណាច និងការគ្រប់គ្រងទឹកដី៕