រដ្ឋមន្ត្រីការបរទេសរុស្ស៊ី លោក Sergei Lavrov បានលើកឡើងថា លោកត្រៀមខ្លួនរួចជាស្រេចហើយក្នុងការជួបជាមួយសមភាគីអាមេរិក លោក Marco Rubio ដោយផ្ទាល់ ដើម្បីពិភាក្សាពីសង្គ្រាមដ៏បង្ហូរឈាមនៅអ៊ុយក្រែន។

គួររម្លឹកថា បន្ទាប់ពីប្រមុខការទូតទាំងពីរបានសន្ទនាតាមទូរសព្ទកាលពីខែតុលាកន្លងទៅ កិច្ចប្រជុំកំពូលមួយដែលគ្រោងទុករវាងមេដឹកនាំរុស្ស៊ី លោក Vladimir Putin និងប្រធានាធិបតីអាមេរិក លោក Donald Trump ក៏ត្រូវលុបចោល ហើយទីក្រុងវ៉ាស៊ីនតោន បានដាក់ទណ្ឌកម្មយ៉ាងតឹងរ៉ឹងលើក្រុមហ៊ុនប្រេងរុស្ស៊ីធំៗចំនួនពីរ។

បន្ទាប់ពីជំនួបទូរសព្ទខែតុលានោះ លោក Rubio បាននិយាយថា លោក Lavrov បានលើកឡើងដដែលៗនូវការទាមទារអតិបរមារបស់ទីក្រុងមូស្គូ សម្រាប់ការបញ្ចប់សង្រ្គាម ហើយលោក Trump បាននិយាយថា លោកនឹងមិន "ខ្ជះខ្ជាយពេលវេលារបស់ខ្លួន" ក្នុងការជួបជាមួយលោក Putin នោះឡើយ។

ក្នុងបទសម្ភាសន៍ជាមួយទីភ្នាក់ងារសារព័ត៌មានគ្រប់គ្រងដោយវិមានក្រឹមឡាំង RIA ដែលចេញផ្សាយកាលពីថ្ងៃអាទិត្យ (៩ វិច្ឆិកា) លោក Lavrov បានលើកឡើងពីលទ្ធភាពនៃការជួបជាមួយលោក Rubio ប៉ុន្តែក៏នៅតែពង្រឹងជំហររបស់ទីក្រុងមូស្គូដដែល។

ប្រមុខការទូតរុស្ស៊ីរូបនេះនិយាយថា "រុស្ស៊ី រួមនឹងលោក Rubio យល់ច្បាស់ពីតម្រូវការទំនាក់ទំនងជាប្រចាំ ថាជារឿងសំខាន់សម្រាប់កិច្ចពិភាក្សាស្ដីពីបញ្ហាអ៊ុយក្រែន និងការជំរុញរបៀបវារៈទ្វេភាគី ដូច្នេះហើយ ភាគីទាំងពីរបានសន្ទនាតាមទូរសព្ទ ហើយក៏ត្រៀមខ្លួនរួចជាស្រេចដែរក្នុងការជួបដោយផ្ទាល់នៅពេលចាំបាច់"៕