លោកប្រធានាធិបតីអ៊ុយក្រែន Volodymyr Zelenskyy បាននិយាយក្នុងបទសម្ភាសន៍មួយជាមួយកាសែត The Guardian ដែលចេញផ្សាយកាលពីថ្ងៃអាទិត្យ (៩ វិច្ឆិកា) ថា ទីក្រុងគីវ ចង់បញ្ជាទិញប្រព័ន្ធការពារដែនអាកាស ប៉ាទ្រីយ៉ូត (Patriot) ចំនួន ២៧គ្រឿង ពីក្រុមហ៊ុនរបស់អាមេរិក ហើយក្នុងពេលនេះ ក៏កំពុងស្វះស្វែងខ្ចីប្រព័ន្ធសំខាន់ៗបែបនេះពីសម្ព័ន្ធមិត្តអឺរ៉ុបរបស់ខ្លួន ស្របពេលការវាយប្រហារកាន់តែខ្លាំងពីរុស្ស៊ី។

ក្នុងប៉ុន្មានសប្តាហ៍ថ្មីៗនេះ អ៊ុយក្រែន បានរងការវាយប្រហារកាន់តែអាក្រក់ឡើងពីរុស្ស៊ី ដោយដាក់គោលដៅលើហេដ្ឋារចនាសម្ព័ន្ធថាមពល ក្នុងពេលរដូវរងាខិតជិតមកដល់។ រោងចក្រថាមពលកម្ដៅ (TPP) ទាំងអស់ ដែលដំណើរការដោយក្រុមហ៊ុនថាមពលរដ្ឋរបស់អ៊ុយក្រែន ឈ្មោះ Centrenergo បានបាត់បង់ប្រតិបត្តការ បន្ទាប់ពីការវាយប្រហារពីរុស្ស៊ី លើហេដ្ឋារចនាសម្ព័ន្ធពេញមួយយប់កាលពីថ្ងៃទី៨ ខែវិច្ឆិកា។

លោក Zelenskyy បាននិយាយថា ទោះបីជាមានការគាំទ្រពីសម្ព័ន្ធមិត្តក៏ដោយ ដរាបណាសង្រ្គាមរបស់រុស្ស៊ីប្រឆាំងនឹងអ៊ុយក្រែននៅតែបន្ត នោះអ៊ុយក្រែននឹងតែងតែត្រូវការជំនួយបន្ថែមជានិច្ច ដោយអំពាវនាវជាថ្មីថា "លោកប្រធានាធិបតីរុស្ស៊ី Vladimir Putin ត្រូវតែបញ្ឈប់សង្គ្រាមជាបន្ទាន់"។

បណ្ដាសម្ព័ន្ធមិត្តរបស់អ៊ុយក្រែន បានផ្តល់ឱ្យទីក្រុងគីវនូវសព្វាវុធជាច្រើន និងបានសម្របសម្រួលការដាក់ទណ្ឌកម្មប្រឆាំងនឹងរុស្ស៊ី ប៉ុន្តែការគាំទ្រទាំងអស់នេះនៅតែមិនអាចបញ្ឈប់សង្រ្គាមរបស់ទីក្រុងមូស្គូបាន ហើយក៏នៅតែខ្វះខាតក្នុងការបំពេញតម្រូវការសមរភូមិរបស់អ៊ុយក្រែន៕