យោងតាមលិខិតមួយផ្ញើទៅកាន់សហរដ្ឋអាមេរិក ដែលមើលឃើញដោយទីភ្នាក់ងារព័ត៌មានរ៉យទ័របានឱ្យដឹងថា ធនាគារពិភពលោក បានគាំទ្រអត្ថន័យនៅក្នុងសេចក្តីសម្រេចមួយរបស់ក្រុមប្រឹក្សាសន្តិសុខអង្គការសហប្រជាជាតិ ដែលព្រាងដោយសហរដ្ឋអាមេរិក ស្តីពីតំបន់ហ្កាហ្សា ដែលនឹងអនុញ្ញាតឱ្យមានអាណត្តិរយៈពេល ២ឆ្នាំនៃស្ថាប័នអភិបាលកិច្ចអន្តរកាលមួយនៅតំបន់ហ៊ុមព័ទ្ធនោះ។

គួរឱ្យដឹងថា ក្រុមប្រឹក្សាសន្តិសុខអង្គការសហប្រជាជាតិ ដែលមានសមាជិក ១៥រូប កាលពីថ្ងៃព្រហស្បតិ៍សប្ដាហ៍មុន បានចាប់ផ្តើមជជែកលើអត្ថបទព្រាងនៃសេចក្ដីសម្រេចនេះ ដែលនឹងផ្តល់អាណត្តិឱ្យក្រុមការងារមួយដែលហៅថា "ក្រុមប្រឹក្សាសន្តិភាព" នៃរដ្ឋបាលអន្តរកាល ដោយផ្តល់ឱ្យក្រុមនេះនូវសិទ្ធិអំណាចក្នុងការបង្កើតអង្គភាពប្រតិបត្តិការដើម្បីដោះស្រាយបញ្ហានានា រួមទាំងការកសាងឡើងវិញនៃតំបន់ហ្កាហ្សា និងកម្មវិធីស្តារសេដ្ឋកិច្ច។

ធនាគារពិភពលោក អង្គការសហប្រជាជាតិ និងសហភាពអឺរ៉ុប បានប៉ាន់ប្រមាណកាលពីខែកុម្ភៈថា ការកសាងតំបន់ហ្កាហ្សាឡើងវិញនឹងត្រូវចំណាយប្រាក់ជាង ៥០ពាន់លានដុល្លារ ហើយកំពុងសម្រេចចុងក្រោយនូវការប៉ាន់ប្រមាណបណ្តោះអាសន្នថ្មីចំនួន ៧០ពាន់លានដុល្លារ។

ក្នុងលិខិតមួយចុះកាលបរិច្ឆេទថ្ងៃសៅរ៍ ទី៨ ខែវិច្ឆិកា ផ្ញើទៅកាន់ឯកអគ្គរដ្ឋទូតអាមេរិកប្រចាំអង្គការសហប្រជាជាតិ — ប្រធានធនាគារពិភពលោក គឺលោក Ajay Banga បានសរសេរសម្ដែងការគាំទ្ររបស់ខ្លួនថា៖ "សំណើបង្កើតអាជ្ញាធរមួយដោយក្រុមប្រឹក្សាសន្តិសុខអង្គការសហប្រជាជាតិ នៅក្នុងសេចក្តីព្រាងបច្ចុប្បន្ននៃក្រុមប្រឹក្សាសន្តិភាព ជាមួយនឹងការអនុញ្ញាតដែលមានចែងក្នុងសេចក្ដីសម្រេច នឹងផ្តល់នូវក្របខណ្ឌចាំបាច់សម្រាប់ការចូលរួមដោយធនាគារពិភពលោក"៕