ប្រធានាធិបតីសហរដ្ឋអាមេរិក លោក Donald Trump កាលពីថ្ងៃអាទិត្យ ទី៩ ខែវិច្ឆិកា បាននិយាយថា លោក John Coale ដែលបានជួយចរចារដោះលែងអ្នកទោសពីប្រទេសបេឡារុស គឺជាជម្រើសរបស់លោកឲ្យក្លាយជាបេសកជនពិសេសប្រចាំទីក្រុង Minsk ហើយនឹងជំរុញឱ្យមានការដោះលែងអ្នកជាប់ឃុំបន្ថែមទៀត។

លោក Trump បានបង្កើនការចូលរួមរបស់សហរដ្ឋអាមេរិកជាមួយរដ្ឋផ្តាច់ការមួយនេះ ដោយបានបញ្ជូនគណៈប្រតិភូជាច្រើនក្រុមទៅកាន់ទីក្រុង Minsk ក្នុងឆ្នាំនេះ។ ប្រធានាធិបតីបេឡារុស លោក Alexander Lukashenko គឺជាសម្ព័ន្ធមិត្តជិតស្និទ្ធរបស់ប្រធានាធិបតីរុស្ស៊ី លោក Vladimir Putin ។

កាលពីខែកញ្ញា ប្រទេសបេឡារុស បានដោះលែងអ្នកទោសចំនួន៥២នាក់បន្ទាប់ពីការអំពាវនាវពីលោក Trump ។ លោកធ្លាប់បានជំរុញឱ្យ លោក Lukashenko ដែលកាន់អំណាចជាង៣០ឆ្នាំមកនេះ ឱ្យដោះលែងអ្នកជាប់ឃុំចំនួន១.៤០០នាក់ ដែលមេដឹកនាំសហរដ្ឋអាមេរិករូបនេះ បានពិពណ៌នាថាជាចំណាប់ខ្មាំង។

លោក Trump បាននិយាយនៅក្នុងការបង្ហោះនៅលើបណ្តាញសង្គម Truth Social ថា «លោក Coale បានចរចាដោយជោគជ័យក្នុងការដោះលែងចំណាប់ខ្មាំង១០០នាក់រួចហើយ និងកំពុងព្យាយាមឲ្យដោះលែង៥០នាក់បន្ថែមទៀត»។ លោកTrump បានអរគុណជាមុនចំពោះប្រធានាធិបតីបេឡារុស លោក Alexander Lukashenko ដែលមានការគោរពខ្ពស់ចំពោះការពិចារណារបស់លោកលើការដោះលែងមនុស្សបន្ថែម»។