ក្រសួងបរិស្ថានកាណាដា បានចេញសេចក្ដីព្រមានពីការធ្លាក់ព្រិល ដែលជាលើកដំបូងបំផុតនៃរដូវរងាឆ្នាំនេះ សម្រាប់ទីក្រុងអូតាវ៉ា និងការព្យាករពីព្រិលធ្លាក់កម្រាស់ពី ១០ ទៅ ២០សង់ទីម៉ែត្រ ជាមួយនឹងលទ្ធភាពនៃភ្លៀងធ្លាក់ត្រជាក់ដូចទឹកកក និងសំណុំទឹកកកតូចៗ នៅថ្ងៃអាទិត្យ (៩ វិច្ឆិកា) ខណៈនគរបាលខេត្ត Ontario និយាយថា ពួកគេបានឆ្លើយតបទៅនឹងការប៉ះទង្គិចតាមដងផ្លូវជាង ១២០ករណី នៅភាគខាងកើតនៃខេត្តនេះ។

ការធ្លាក់ព្រិលបានចាប់ផ្តើមដំបូងនៅព្រឹកថ្ងៃអាទិត្យ (ម៉ោងក្នុងស្រុក) ហើយត្រូវរំពឹងថា នឹងបន្តពេញមួយយប់ ដោយព្រិលធ្លាក់ខ្លាំងបំផុតកើតឡើងនៅពេលរសៀលថ្ងៃដដែល។ ក្រសួងបរិស្ថានកាណាដា និយាយថា ទីក្រុងអូតាវ៉ា ជាពិសេសនៅតំបន់ភាគខាងត្បូង និងភាគខាងកើតនៃទីក្រុង ក៏អាចជួបប្រទះនឹងភ្លៀងធ្លាក់ដ៏ត្រជាក់ និងដុំទឹកកកតូចៗ នៅពេលល្ងាចថ្ងៃអាទិត្យផងដែរ។

ក្រសួងនេះបានព្រមានថា ការធ្វើដំណើរអាចនឹងមានបញ្ហា ហើយកម្រិតនៃការមើលឃើញកក៏ទំនងជាធ្លាក់ចុះ ខណៈសីតុណ្ហភាពថ្ងៃអាទិត្យ នឹងធ្លាក់ដល់កម្រិតទាបបំផុត -៣អង្សាសេ និងខ្ពស់បំផុតត្រឹម -១អង្សាសេ ចំណែកខ្យល់ត្រជាក់នឹងមានសីតុណ្ហភាពនៅជិត -៧អង្សាសេ ក្នុងពេលថ្ងៃ។

ភ្ញៀវទេសចរ និងអ្នកស្រុកនៅកាណាដា កំពុងតែរីករាយនឹងព្រិលដំបូងនៃរដូវរងាឆ្នាំ២០២៥នេះ។ កាលពីឆ្នាំមុន ដានដំបូងនៃព្រិល ត្រូវបានគេមើលឃើញនៅថ្ងៃទី២៧ ខែវិច្ឆិកា និងនៅថ្ងៃទី១ ខែធ្នូ ជាមួយនឹងព្រិលកម្រាស់ស្ដើង ២,២សង់ទីម៉ែត្រ ត្រូវបានកត់ត្រា៕