មន្រ្តីនគរបាលឥណ្ឌា បានចាប់ឃុំខ្លួនមនុស្សរាប់សិបនាក់ អំឡុងពេលបាតុកម្មដ៏កម្រមួយនៅឯវិមាន ខ្លោងទ្វារឥណ្ឌា (India Gate) ដ៏ល្បីល្បាញនៅទីក្រុងញូវដែលី ដែលបានចេញតវ៉ាទាមទារឱ្យចាត់វិធានការបន្ទាន់ដើម្បីទប់ស្កាត់វិបត្តិប្រចាំឆ្នាំនៃការបំពុលខ្យល់ ដែលវាយលុករដ្ឋធានីឥណ្ឌាមួយនេះ និងតំបន់ជុំវិញក្រុងដែលី។

ការតវ៉ាកើតឡើងនៅថ្ងៃអាទិត្យ (៩ វិច្ឆិកា) ដោយហ្វូងមនុស្សគ្រប់វ័យបានកាន់បដា និងស្រែកពាក្យតវ៉ា មុនពេលនគរបាលចេញប្រតិបត្តិការរារាំង។ នេះជាព្រឹត្តិការណ៍ដ៏កម្រមួយ បើទោះជាក្រុងដែលី និងតំបន់ជុំវិញរដ្ឋធានី ជួបប្រទះនឹងផ្សែងអ័ព្ទពុលបែបនេះជារៀងរាល់រដូវរងាអស់ច្រើនឆ្នាំមកហើយក្ដី។

រូបភាពពីប្រព័ន្ធផ្សព្វផ្សាយក្នុងស្រុក បានបង្ហាញឱ្យឃើញនគរបាលអូសក្រុមបាតុករ ដោយអ្នកខ្លះកាន់បដាសរសេរថា "ការដកដង្ហើមកំពុងសម្លាប់មនុស្ស" ខណៈអ្នកផ្សេងទៀតស្រែកពាក្យតវ៉ាដូចជា "សិទ្ធិពលរដ្ឋ ខ្យល់អាកាសបរិសុទ្ធ"។ ហ្វូងបាតុករនិយាយថា៖ ពួកគេមានបញ្ហាតែមួយគត់ នោះគឺខ្យល់បរិសុទ្ធ ដោយបញ្ហានេះបន្តអស់ច្រើនឆ្នាំមកហើយ ប៉ុន្តែមិនមានវិធានការណាមួយត្រូវធ្វើឡើងនោះទេ។

សន្ទស្សន៍គុណភាពខ្យល់របស់ទីក្រុងញូវដែលី នៅថ្ងៃចន្ទនេះ ស្ថិតនៅកម្រិត ៣៤៥ ដែលត្រូវចាត់ថ្នាក់ថា "អាក្រក់ខ្លាំង" បើប្រៀបធៀបទៅនឹងការវាយតម្លៃគុណភាពខ្យល់ "ល្អ" នៅក្នុងប្រភេទពីសូន្យដល់ ៥០ និងកម្រិត "ធ្ងន់ធ្ងរ" នៅក្នុងចន្លោះពី ៤០១ ដល់ ៥០០ យោងតាមក្រុមប្រឹក្សាកណ្ដាលដែលត្រួតពិនិត្យការបំពុលបរិយាកាសរបស់ឥណ្ឌា៕