រដ្ឋមន្ត្រីក្រសួងសុខាភិបាលលីបង់ លោក Rakan Nassereddine បាននិយាយថា ចំនួនអ្នកស្លាប់ពីការវាយប្រហារតាមអាកាសរបស់អ៊ីស្រាអែលលើប្រទេសលីបង់ បានលើសពី ៣០០នាក់ ចាប់តាំងពីចុងខែវិច្ឆិកា ឆ្នាំ ២០២៤ នៅពេលដែលកិច្ចព្រមព្រៀងឈប់បាញ់ ត្រូវបានចុះហត្ថលេខា។ 

យោងតាមការបង្ហោះរបស់លោកនៅលើវេទិកា X ចាប់តាំងពីថ្ងៃទី២៧ ខែវិច្ឆិកា ឆ្នាំ ២០២៤ អ៊ីស្រាអែលបានរំលោភលើបទឈប់បាញ់ចំនួន ៥.១៦៣ដង ដោយបានសម្លាប់មនុស្ស ៣០៩នាក់ និង បង្កឲ្យ ៥៩៨នាក់ផ្សេងទៀត រងរបួស។

នៅក្នុងខែតុលា មនុស្ស ២៨នាក់ ត្រូវបានសម្លាប់ នៅក្នុងការវាយប្រហាររបស់អ៊ីស្រាអែលលើតំបន់ភាគខាងត្បូង និងខាងកើតរបស់ប្រទេសលីបង់។

ទោះជាយ៉ាងណាក៏ដោយ អ៊ីស្រាអែលបានអះអាងថា ប្រតិបត្តិការរបស់ខ្លួននៅក្នុងប្រទេសលីបង់ គឺកំណត់គោលដៅទៅលើក្រុមហេសបូឡា ដែលប្រទេសនេះ បានចាត់ទុកថា ជាការគំរាមកំហែងដល់សន្តិសុខរបស់ខ្លួន៕