មន្ត្រីជាន់ខ្ពស់របស់ក្រុមហាម៉ាស លោក Ismail Radwan បាននិយាយថា ក្រុមនេះ បានជូនដំណឹងដល់អ្នកសម្របសម្រួលអំពីការត្រៀមខ្លួនដកចេញពីតំបន់មួយចំនួនដែលគ្រប់គ្រងដោយអ៊ីស្រាអែល នៅក្នុងតំបន់ហ្កាហ្សា។ 

លោកបានប្រាប់បណ្តាញទូរទស្សន៍ Al Jazeera ថា៖«យើងបានជូនដំណឹងដល់អ្នកសម្របសម្រួលថា យើងត្រៀមខ្លួនរួចជាស្រេច ដើម្បីដកយុទ្ធជនចេញពីតំបន់លឿង ដោយសំដៅទៅលើអ្វីដែលហៅថា ខ្សែបន្ទាត់ពណ៌លឿង ឬព្រំដែនដែលកងទ័ពអ៊ីស្រាអែល បានដកចេញ ជាផ្នែកមួយនៃកិច្ចព្រមព្រៀងឈប់     បាញ់។

លោកក៏បាននិយាយផងដែរថា ក្រុមហាម៉ាសត្រៀមខ្លួន ដោះស្រាយបញ្ហានៃការប្រគល់សាកសពចំណាប់ថ្នូរអ៊ីស្រាអែល ឲ្យបានឆាប់តាមដែលអាចធ្វើទៅបាន ហើយបានបញ្ជាក់ជាថ្មីថា អង្គការនេះ ប្តេជ្ញាចិត្តចំពោះបទឈប់បាញ់។

ក្នុងពេលជាមួយគ្នានេះ លោកបានកត់សម្គាល់ថា ក្រុមហាម៉ាស នៅតែបន្តរាយការណ៍ពីការរំលោភបំពានបទឈប់បាញ់ដោយអ៊ីស្រាអែល។ លោកបានលើកឡើងថា ចំនួនអ្នកស្លាប់ដោយសារសកម្មភាពរបស់អ៊ីស្រាអែលក្នុងរយៈពេលនៃការឈប់បាញ់ បានកើនឡើងដល់ ២៤១នាក់។

អ៊ីស្រាអែល និងក្រុមហាម៉ាស បានបន្តការចរចាដោយប្រយោលដែលសម្របសម្រួលដោយអេហ្ស៊ីប កាតា សហរដ្ឋអាមេរិក និងទួរគី ស្តីពីការដោះស្រាយស្ថានការណ៍នៅក្នុងតំបន់ហ្កាហ្សាស្ទ្រីប នៅថ្ងៃទី ០៦ ខែតុលា។ នៅថ្ងៃទី ០៩ ខែតុលា ភាគីជម្លោះ បានចុះហត្ថលេខាលើកិច្ចព្រមព្រៀងស្តីពីការអនុវត្តដំណាក់កាលទី១នៃផែនការឈប់បាញ់នៅតំបន់ហ្កាហ្សារបស់ប្រធានាធិបតីអាមេរិក ដូណាល់ ត្រាំ។ បទឈប់បាញ់ បានចូលជាធរមាននៅថ្ងៃទី ១០ ខែតុលា។ ក្រោមកិច្ចព្រមព្រៀងនេះ អ៊ីស្រាអែល បានដកកងទ័ពរបស់ខ្លួនចេញពីតំបន់កណ្តាលនៃតំបន់ហ្កាហ្សាទៅកាន់អ្វីដែលហៅថា ខ្សែបន្ទាត់ពណ៌លឿង ប៉ុន្តែនៅតែគ្រប់     គ្រងលើទឹកដីជាង ៥០% នៃតំបន់ហ្កាហ្សាស្ទ្រីប៕