នាយករដ្ឋមន្ត្រីជប៉ុន លោកស្រី Sanae Takaichi នៅថ្ងៃចន្ទ (ទី១០ ខែវិច្ឆិកា) នេះ បាននិយាយថា លោកស្រីនឹងធ្វើការ ជុំវិញការកំណត់គោលដៅសារពើពន្ធថ្មីដែលបន្លាយរយៈពេលជាច្រើនឆ្នាំ ដើម្បីអនុញ្ញាតឲ្យការចំណាយមានភាពបត់បែនបន្ថែមទៀត ដោយកាត់បន្ថយនូវការប្តេជ្ញាចិត្តរបស់ប្រទេសប្រកបដោយប្រសិទ្ធភាព ចំពោះភាពរឹងមាំសារពើពន្ធ។

ជាមួយគ្នានេះ លោកស្រី Takaichi ក៏បានលើកឡើងផងដែរថា លោកស្រីនឹងមិនច្រានចោលការកាត់ពន្ធលើការលក់របស់ប្រទេសជប៉ុន ជាជម្រើសនាពេលអនាគតនោះទេ ដោយធ្វើឲ្យមានការរំពឹងទុកកាន់តែខ្ពស់របស់ទីផ្សារ ដែលថា រដ្ឋបាលរបស់លោកស្រី នឹងផ្តល់អាទិភាពដល់គោលនយោបាយ ដើម្បីជំរុញសេដ្ឋកិច្ច ជាជាងការជួសជុលហិរញ្ញវត្ថុសាធារណៈដែលកាន់តែអាក្រក់ទៅៗ។

ការកត់សម្គាល់នេះ បង្ហាញពីការកែប្រែដ៏ធំពីអតីតរដ្ឋបាលដែលជាប់ទៅនឹងគោលដៅសារពើពន្ធប្រចាំឆ្នាំ និងបានសង្កត់ធ្ងន់លើតម្រូវការ ក្នុងការរក្សាការជឿទុកចិត្តទីផ្សារនៅក្នុងហិរញ្ញវត្ថុរបស់ជប៉ុន បើទោះបីជាពួកគេបានដាក់ចេញកញ្ចប់ចំណាយដ៏ច្រើនក៏ដោយ។

អំឡុងពេលថ្លែងទៅកាន់សភា លោកស្រី Takaichi បានប្រាប់ថា៖ «យើងនឹងធានាឲ្យបាននូវការទុកចិត្តក្នុងទីផ្សារ លើហិរញ្ញវត្ថុប្រកបដោយនិរន្តរភាពរបស់ប្រទេសជប៉ុន។ ប៉ុន្តែប្រសិនបើយើងមិនជំរុញការវិនិយោគទេនោះ សេដ្ឋកិច្ចនឹងមិនរីកចម្រើនឡើយ»។

តែយ៉ាងណាក្ដី ការផ្តោតរបស់រដ្ឋបាលលើគោលនយោបាយពង្រីកការចំណាយនេះ អាចធ្វើឲ្យមានភាពស្មុគស្មាញដល់ការសម្រេចរបស់ធនាគារកណ្តាលជប៉ុន អំពីថា តើនៅពេលណាត្រូវចាប់ផ្តើមឡើងវិញនូវវដ្តនៃការដំឡើងអត្រាការប្រាក់ដែលត្រូវបានផ្អាក ដោយសារភាពមិនច្បាស់លាស់សេដ្ឋកិច្ច ដែលប៉ះពាល់ដោយអាត្រាពន្ធគយខ្ពស់របស់សហរដ្ឋអាមេរិក៕