អង្គការសហប្រជាជាតិ (UN) នាថ្ងៃចន្ទ (ទី១០ ខែវិច្ឆិកា) នេះ បានលើកឡើងថា ជនភៀសខ្លួនរាប់លាននាក់ កំពុងជាប់ក្នុងវដ្ដដ៏កំណាចនៃជម្លោះ និងអាកាសធាតុអាក្រក់ធ្ងន់ធ្ងរ ដោយជំរុញឲ្យកិច្ចប្រជុំកំពូល COP30 ផ្តល់ហិរញ្ញប្បទានដល់ក្រុមងាយរងគ្រោះបំផុត។

UNHCR ដែលជាទីភ្នាក់ងារជនភៀសខ្លួនរបស់ UN បានឲ្យដឹងថា ក្នុងរយៈពេល ១៥ឆ្នាំ ទីកន្លែងនានាដែលបច្ចុប្បន្នផ្ដល់ជម្រកដល់ជនភៀសខ្លួនជិតពាក់កណ្តាលរបស់ពិភពលោក អាចប្រឈមនឹងការប៉ះពាល់ធ្ងន់ធ្ងរខ្លាំង ដែលទាក់ទងនឹងបម្រែបម្រួលអាកាសធាតុ។

ទីភ្នាក់ងារនេះ បានលើកឡើងនៅក្នុងរបាយការណ៍មួយថា៖ «បម្រែបម្រួលអាកាសធាតុ មិនត្រឹមតែបង្កើនភាពងាយរងគ្រោះដែលមានស្រាប់ប៉ុណ្ណោះទេ ប៉ុន្តែវាថែមទាំងជំរុញឲ្យមាននិន្នាការបម្លាស់ទីលំនៅ បង្កើតភាពស្មុគស្មាញ និងធ្វើឲ្យមានហានិភ័យកាន់ខ្លាំងទៅៗ សម្រាប់ជនភៀសខ្លួន ដោយមិនឲ្យនរណាម្នាក់រួចផុតពីផលប៉ះពាល់របស់វា»។

ទីភ្នាក់ងារនេះ បានបន្តថា ផលប៉ះពាល់ដ៏គួរឲ្យភ្ញាក់ផ្អើលដោយសារអាកាសធាតុ កំពុងបង្កើនតម្រូវការមនុស្សធម៌ និងធ្វើឲ្យមានហានិភ័យកាន់តែខ្លាំងនៃការផ្លាស់ទីលំនៅដដែលៗ។ UNHCR បានឲ្យដឹងថា នៅពាក់កណ្តាលឆ្នាំ២០២៥ ប្រជាជន ១១៧លាននាក់ ត្រូវបានបម្លាស់ទីលំនៅ ដោយសារសង្រ្គាម អំពើហិង្សា និងការធ្វើទុក្ខបុកម្នេញ។

ហើយលើសពីនោះទៀត ទីភ្នាក់ងារនេះបានឲ្យដឹងទៀតថា ក្នុងចំណោមនោះ ៣នាក់ ក្នុងចំណោមមនុស្ស ៤នាក់ កំពុងរស់នៅក្នុងប្រទេសដែលប្រឈមនឹងការប៉ះពាល់ពីខ្លាំង រហូតដល់ធ្ងន់ធ្ងរខ្លាំងទៅៗ ទាក់ទងនឹងបម្រែបម្រួលអាកាសធាតុ។ ហើយទីភ្នាក់ងារនេះបានបន្ថែមថា ក្នុងរយៈពេល ១០ឆ្នាំកន្លងមកនេះ គ្រោះមហន្តរាយទាក់ទងនឹងអាកាសធាតុ បានបណ្តាលឲ្យមានការផ្លាស់ទីលំនៅក្នុងប្រទេស ប្រហែល ២៥០លាននាក់ នៅក្នុងប្រទេសនានា៕