​បាល់ទាត់៖ ​ក្រុម​អ្នកមាន​ថ្មី Newcastle United បាន​ឡើង​ផុតពី​តំបន់​ដែល​ត្រូវ​កាត់ចោល​នៅ​ក្របខណ្ឌ English Premier League ៤ពិន្ទុ​បន្ទាប់ពី​យកឈ្នះ Aston Villa ១-០​។ ​​ខ្សែការពារ​ស្លាប​ស្តាំ​អង់គ្លេស​ដែល​ទើប​ផ្ទេរ​ពី Atletico Madrid តម្លៃ ១២លាន​ផោន Kieran Trippier គឺជា​អ្នក​ស៊ុត​បាល់​ពិន័យ​ហ្វ្រី​ឃី​កយ៉ាង​ល្អ​នៅ​នាទី​ទី៣៥ ដែលជា​គ្រាប់​ជ័យជំនះ​សំរាប់ Newcastle ក្នុង​សប្តាហ៍​ទី២៣ របស់ខ្លួន​។

​​ជ័យជំនះ​នេះ​ធ្វើឱ្យ Newcastle ឈរ​លេខ ១៧ តែ​គំលាត​ពី​តំបន់​គ្រោះថ្នាក់ ៤ពិន្ទុដែលមាន Norwich City​។ ​​ងាក​មក​លទ្ធផល​ផ្សេងទៀត Tottenham Hotspur បន្ត​ដុនដាបក្រោយ​ចាញ់ Wolverhampton ២-០ ក្នុង​ទឹកដី​ខ្លួនឯង​។ ​​ពីរ​គ្រាប់​ក្នុង​វគ្គ​ទី១ ដោយ Raul Jimenez និង Leander Dendoncker គ្រប់​គ្រាន់​ឱ្យ Wolves យកឈ្នះ​ក្នុង​សប្តាហ៍​ទី២៣ របស់ខ្លួន​ឡើងមក​ឈរ​លេខ៧ ពីលើ Tottenham Horspur វិញ​។ ​ដោយឡែក​សំរាប់ Spurs ដែល​ដឹកនាំ​ដោយ​លោក Antonio Conte នៅពេលនេះ​ចាញ់ ៣ប្រកួត​ជាប់​គ្នា​ក្នុង​លី​គជា​លើកដំបូង​ក្នុង​អាជីព ​របស់​អ្នកចាត់ការ​សញ្ជាតិ​អ៊ីតាលី​រូបនេះតាំងពី​ដឹកនាំ​នៅ Atalanta នៅ​ឆ្នាំ២០០៩​។

​​ចំណែកឯ​ហង្ស​ក្រហម Liverpool បាន​បន្ត​ដេញ​ពីក្រោយ​ក្រុម​កំពូល​តារាង Manchester City ៩ពិន្ទុ​ដដែល​ក្រោយ​យកឈ្នះ​នៅ​ទឹកដី Burnley ១-០ ដោយ​គ្រាប់​បាល់​របស់ Fabinho​។ ​​ក្រុម​របស់លោក Jurgen Klopp នៅពេលនេះ​ប្រកួត​តិចជាង Manchester City ១ប្រកួត ខណៈ​នាំ​មុខដាច់​ក្រុម​លេខ ៣ តោ​ខៀវ Chelsea ៧ពិន្ទុ​។ ​​រីឯ Burnley បន្ត​ឈរ​បាត​តារាង​មាន​ត្រឹម ១៤ពិន្ទុ​ពី​ការប្រកួត ២១លើក​។ មួយគូ​ចុងក្រោយ​គឺ Leicester City ទទួល West Ham បានបញ្ចប់​ត្រឹម​លទ្ធផល​ស្មើគ្នា ២-២​។ ​Leicester City ឡើងមក​លេខ ១១ មាន ២៧ពិន្ទុ​ ខណៈ West Ham បន្ត​ឈរ​លេខ ៤ មាន ៤១ពិន្ទុ​៕

​អត្ថបទ​៖​នាង សុភា​វុ​ធ