អាជ្ញាធរមហាផ្ទៃ បាននិយាយនៅក្នុងសេចក្តីថ្លែងការណ៍មួយកាលពីថ្ងៃសៅរ៍ថា ប្រទេសស៊ីរី បានចាប់ផ្តើមប្រតិបត្តិការសន្តិសុខទ្រង់ទ្រាយធំ នៅទូទាំងខេត្តជាច្រើន ដើម្បីស្វែងរកក្រុមរដ្ឋឥស្លាម (IS)។

អាជ្ញាធរបាននិយាយថា ផ្អែកលើ«ការត្រួតពិនិត្យចារកម្មយ៉ាងច្បាស់លាស់» ប្រតិបត្តិការនេះ និងត្រូវបានគេរំពឹងថា នឹងមានរយៈពេលជាច្រើនថ្ងៃ ដោយកំណត់គោលដៅទៅលើកន្លែងលាក់ខ្លួន និងក្រុមអ្នកលាក់ខ្លួនរបស់ IS តាមរយៈការសម្របសម្រួលជាមួយអគ្គនាយកដ្ឋានចារកម្មទូទៅ។

អង្គភាពជំនាញ កំពុងធ្វើប្រតិបត្តិការនៅក្នុងតំបន់ជាច្រើន រួមទាំងខេត្ត Idlib នៅភាគពាយ័ព្យនៃប្រទេសស៊ីរី ជាមួយនឹងវីដេអូដែលបង្ហាញពីកងកម្លាំងវាយឆ្មក់ទីតាំងដែលសង្ស័យថា ជាក្រុម IS។

អាជ្ញាធរមិនបានផ្តល់ព័ត៌មានលម្អិតអំពីការចាប់ខ្លួន ឬអ្នកស្លាប់នោះទេ។

កិច្ចប្រតិបត្តិការនេះ កើតឡើងស្របគ្នានឹងដំណើរទស្សនកិច្ចរបស់មេដឹកនាំបណ្តោះអាសន្នស៊ីរី លោក Ahmad al-Sharaa នៅសហរដ្ឋអាមេរិក ជាកន្លែងដែលកិច្ចខិតខំប្រឹងប្រែងប្រឆាំងភេរវកម្មប្រឆាំងនឹងក្រុមISដែលនៅសល់ នៅក្នុងប្រទេសស៊ីរី ត្រូវបានគេរំពឹងថា នឹងត្រូវបានពិភាក្សា៕