ការភ័យខ្លាច បានគ្របដណ្ដប់លើជនជាតិភាគតិចកាន់គ្រិស្តសាសនា មួយចំនួនរបស់ប្រទេសបង់ក្លាដែស បន្ទាប់ពីការវាយប្រហារដោយគ្រាប់បែកដ៏ឃោរឃៅចំនួនបីទៅលើព្រះវិហារ និងសាលារៀនកាតូលិកមួយ ដែលកាលពីថ្ងៃអាទិត្យ ដែលនរគបាលបាននិយាយថា មិនបានបង្កឲ្យមានអ្នករងរបួសទេ ប៉ុន្តែត្រូវបានធ្វើឡើង ដើម្បីសាបព្រោះភេរវកម្ម។

ពុំមានក្រុមណាមួយ អះអាងទទួលខុសត្រូវចំពោះឧប្បត្តិហេតុ ឬពន្យល់ពីមូលហេតុ ដែលសហគមន៍គ្រិស្តបរិស័ទ ដែលមានប្រជាជនប្រហែល ៥00.000 នាក់ ក្នុងចំណោមពលរដ្ឋ ១៧០លាននាក់របស់ប្រទេសអាស៊ីខាងត្បូងនេះ ត្រូវបានកំណត់គោលដៅនោះទេ។

អ្នកនាំពាក្យនគរបាលទីក្រុងដាក្កា លោក Muhammad Talebur Rahman បានប្រាប់សារព័ត៌មាន AFP ថា៖«យើងកំពុងព្យាយាមកំណត់ថាតើឧប្បត្តិហេតុទាំងនេះ មានទំនាក់ទំនងគ្នា ឬដាច់ដោយឡែកពីគ្នា ការវាយប្រហារទាំងនេះ ពិតជាមានគោលបំណងធ្វើឲ្យប្រជាជនភ័យខ្លាច»។

ប្រទេសបង់ក្លាដែស បានស្ថិតក្នុងភាពចលាចលនយោបាយ ចាប់តាំងពីការបះបោរដែលបានបណ្តាលឲ្យមនុស្សស្លាប់យ៉ាងច្រើន បានផ្តួលរំលំរដ្ឋាភិបាលផ្តាច់ការរបស់លោកស្រី Sheikh Hasina ជាងមួយឆ្នាំកន្លងទៅនោះ៕