សហភាពអាហ្រ្វិកបានអំពាវនាវឲ្យមានការឆ្លើយតបបន្ទាន់ជាអន្តរជាតិ ក្នុងនោះរួមទាំងការចែករំលែកព័ត៌មានសម្ងាត់ផងដែរ ដើម្បីដោះស្រាយស្ថានភាពសន្តិសុខកាន់តែអាក្រក់ទៅៗ នៅក្នុងប្រទេសម៉ាលី ជាទីដែលក្រុមបះបោរកំពុងរាំងខ្ទប់ប្រេងឥន្ធនៈ និងចាប់ជំរិតជនបរទេស។

ក្រុមជីហាដនិយមដែលមានទំនាក់ទំនងជាមួយអាល់កៃដា ជាក្រុមសកម្មនៅក្នុងតំបន់ Sahel របស់អាហ្វ្រិកខាងលិច បានរារាំងការនាំចូលប្រេងឥន្ធនៈ ចាប់តាំងពីខែកញ្ញា ដោយវាយប្រហារក្បួនរថយន្តដឹកប្រេង ហើយបង្កើតឲ្យមានការខ្វះខាតដែលជំរុញឲ្យសាលារៀន និងអាជីវកម្មបិទទ្វារ។

ការបង្ហាញកម្លាំងចុងក្រោយបង្អស់របស់ក្រុមនេះ គឺក្រុម Jama'at Nusrat al-Islam wal-Muslimin បានធ្វើឲ្យមានក្ដីបារម្ភ ដែលថា នៅទីបំផុត ក្រុមនេះអាចនឹងព្យាយាមដាក់ការគ្រប់គ្រងរបស់ខ្លួន លើប្រទេសដែលគ្មានព្រំដែនសមុទ្រមួយនេះ។ ប្រទេសលោកខាងលិច ក្នុងនោះរួមទាំងសហរដ្ឋអាមេរិក បារាំង អង់គ្លេស និងអ៊ីតាលីផងដែរ កំពុងជំរុញឲ្យពលរដ្ឋរបស់ខ្លួនចាកចេញ។

នៅក្នុងសេចក្តីថ្លែងការណ៍មួយ កាលពីថ្ងៃអាទិត្យ (ទី៩ ខែវិច្ឆិកា) លោក Mahmoud Ali Youssouf ប្រធានគណៈកម្មការសហភាពអាហ្រ្វិក បានសម្តែង «ក្ដីបារម្ភយ៉ាងខ្លាំង ចំពោះស្ថានភាពសន្តិសុខដែលកាន់តែអាក្រក់ទៅៗយ៉ាងឆាប់រហ័ស នៅក្នុងប្រទេសម៉ាលី ដែលក្រុមភេរវករបានបិទខ្ទប់ ដោយបានរំខានដល់លទ្ធភាពផ្គត់ផ្គង់សំខាន់ៗ និងធ្វើឲ្យស្ថានភាពមនុស្សធម៌កាន់តែធ្ងន់ធ្ងរឡើងៗ សម្រាប់ប្រជាជនស៊ីវិល»។

លោកបាននិយាយថា គួរតែមាន «ការលើកកម្ពស់កិច្ចសហប្រតិបត្តិការ ការចែករំលែកព័ត៌មានសម្ងាត់ និងការគាំទ្រប្រកបដោយនិរន្តរភាព» សម្រាប់ប្រទេសនៅក្នុងតំបន់ Sahel ដែលរងផលប៉ះពាល់ដោយអំពើជ្រុលនិយម។ ហើយលោកក៏បានអំពាវនាវឲ្យមានការដោះលែងជាបន្ទាន់នូវជនជាតិអេហ្ស៊ីប ៣នាក់ ដែលលោកបាននិយាយថា ត្រូវបានចាប់ពង្រត់នាពេលថ្មីៗនេះ៕