រដ្ឋមន្ត្រីក្រសួងការពារជាតិអាមេរិកលោក Pete Hegseth បាននិយាយកាលពីថ្ងៃចន្ទ១០ វិច្ឆិកា ថាកងកម្លាំងអាមេរិកបានសម្លាប់មនុស្ស៦នាក់បន្ថែមទៀតក្នុងការវាយប្រហារលើទូកដែលចោទប្រកាន់ពីបទរត់ពន្ធគ្រឿងញៀន ដែលនាំឱ្យចំនួនអ្នកស្លាប់សរុបនៃយុទ្ធនាការនេះ កើនឡើងដល់ ៧៦ នាក់។   

ក្នុងការបង្ហោះមួយនៅលើបណ្ដាញសង្គម X លោក Hegseth បាននិយាយថា សហរដ្ឋអាមេរិកបានវាយប្រហារកាលពីថ្ងៃអាទិត្យក្នុងដែនទឹកអន្តរជាតិនៅភាគខាងកើតមហាសមុទ្រប៉ាស៊ីហ្វិក ដោយកំណត់គោលដៅលើទូកពីរគ្រឿងដែលដឹកគ្រឿងញៀន មានមនុស្សបីនាក់នៅលើទូកនីមួយៗ។

លោកបាននិយាយថា មនុស្សទាំង ៦ នាក់ត្រូវបានសម្លាប់។ គ្មានកងកម្លាំងអាមេរិកណាម្នាក់រងរបួសទេ។

ដូចនៅក្នុងការវាយប្រហារមុនៗ ដែលបានចាប់ផ្តើមក្រោមរដ្ឋបាលរបស់ប្រធានាធិបតីលោក Donald Trump ក្នុងខែកញ្ញា ក្រុមមន្ត្រីអាមេរិកមិនបានបញ្ចេញអត្តសញ្ញាណរបស់អ្នកដែលត្រូវបានសម្លាប់នោះទេ។

រដ្ឋបាលនេះពុំបានបញ្ចេញភស្តុតាងរឹងមាំណាមួយដែលបង្ហាញថាទូកទាំងនោះបានរត់ពន្ធគ្រឿងញៀន ឬបង្កការគំរាមកំហែងដល់សហរដ្ឋអាមេរិកនោះទេ។

ក្រុមអ្នកជំនាញនិយាយថា ការវាយប្រហារទាំងនោះ ដែលបានកើតឡើងទាំងនៅសមុទ្រប៉ាស៊ីហ្វិក និងសមុទ្រការ៉ាអ៊ីប គឺស្មើនឹងការសម្លាប់ក្រៅប្រព័ន្ធតុលាការ ទោះបីជាពួកគេកំណត់គោលដៅលើអ្នកជួញដូរដែលគេស្គាល់ក៏ដោយ។លោក Hegseth បាននិយាយថា នាវាទាំងពីរគ្រឿងត្រូវបានដំណើរការដោយអង្គការភេរវករដែលបានកំណត់ ប៉ុន្តែមិនបានប្រាប់ឈ្មោះក្រុមទាំងនោះទេ៕