បណ្តាញទូរទស្សន៍ក្នុងស្រុកជាច្រើនបានរាយការណ៍នៅថ្ងៃអង្គារ (១១ វិច្ឆិកា) នេះដោយសម្អាងដល់នគរបាលថា សមត្ថកិច្ចឥណ្ឌា កំពុងបើកការស៊ើបអង្កេតករណីផ្ទុះរថយន្តដ៏គួរឱ្យភ្ញាក់ផ្អើលមួយដែលបានសម្លាប់មនុស្សជាច្រើននាក់ នៅក្នុងរដ្ឋធានីញូវដែលី ក្រោមច្បាប់ដ៏តឹងរ៉ឹងដែលប្រើដើម្បីប្រយុទ្ធប្រឆាំងនឹង "អំពើភេរវកម្ម"។

ច្បាប់នេះហៅថា ការរារាំងសកម្មភាពមិនស្របច្បាប់ ដែលជាច្បាប់ប្រឆាំងអំពើភេរវកម្មដ៏សំខាន់របស់ឥណ្ឌា ហើយត្រូវបានប្រើដើម្បីស៊ើបអង្កេត និងកាត់ទោសអំពើដែលទាក់ទងនឹង "ភេរវកម្ម" និងសកម្មភាពទាំងឡាយណាដែលគំរាមកំហែងដល់អធិបតេយ្យភាព និងបូរណភាពរបស់ប្រទេស។

គួរឱ្យដឹងថា ហេតុការណ៍ផ្ទុះរថយន្តមួយកើតឡើងនៅជិតបន្ទាយ Red Fort ដ៏ប្រវត្តិសាស្ត្រ កាលពីល្ងាចថ្ងៃចន្ទ បានសម្លាប់មនុស្សយ៉ាងតិច ១០នាក់ និងរងរបួស ២០នាក់ ដែលជាការផ្ទុះដ៏កម្រនៅក្នុងទីក្រុងដែលមានមនុស្សជាង ៣០លាននាក់រស់នៅ ហើយត្រូវការពារយ៉ាងតឹងរ៉ឹងបំផុត។ នគរបាលនិយាយថា រថយន្តមួយគ្រឿងនោះកំពុងតែបើកយឺតៗដោយត្រូវឈប់ចាំភ្លើងស្តុបចរាចរណ៍ រួចក៏បានផ្ទុះនៅមុនម៉ោងក្នុងស្រុក ៧យប់ ចំណែករថយន្តនៅក្បែរនោះក៏រងការខូចខាតយ៉ាងដំណំផងដែរ ។

ការផ្ទុះនេះបានបន្សល់ទុកនូវសាកសពខ្ទេចខ្ទីរាយប៉ាយ និងកម្ទេចកម្ទីរថយន្តលើដងផ្លូវដែលមានការកកស្ទះ នៅជិតស្ថានីយ៍រថភ្លើងក្រោមដីក្នុងសង្កាត់ដ៏ចំណាស់នៃទីក្រុងញូវដែលី។ រដ្ឋមន្ត្រីក្រសួងមហាផ្ទៃសហព័ន្ធ លោក Amit Shah បាននិយាយកាលពីថ្ងៃចន្ទថា "គ្រប់ជ្រុងទាំងអស់" កំពុងត្រូវបានស៊ើបអង្កេត ហើយភ្នាក់ងារសន្តិសុខនឹងឈានដល់ការសន្និដ្ឋានមួយក្នុងពេលឆាប់ៗនេះ៕