ប្រធានាធិបតីអាមេរិក លោក Donald Trump កាលពីថ្ងៃចន្ទ (១០ វិច្ឆិកា) បានប្តេជ្ញាថា លោកនឹងធ្វើអ្វីគ្រប់យ៉ាងដែលអាចទៅរួច ដើម្បីធ្វើឱ្យប្រទេសស៊ីរី ទទួលបានជោគជ័យ បន្ទាប់ពីកិច្ចចរចាដ៏សំខាន់ជាមួយលោកប្រធានាធិបតីស៊ីរី Ahmed al-Sharaa ដែលជាអតីតមេបញ្ជាការក្រុមអាល់កៃដា ហើយក៏ជាបុគ្គលដែលធ្លាប់ត្រូវទីក្រុងវ៉ាស៊ីនតោន ដាក់ទណ្ឌកម្មក្នុងនាមជាភេរវករបរទេស។

ដំណើរទស្សនកិច្ចរបស់លោក Sharaa គឺជារឿងដ៏គួរឱ្យភ្ញាក់ផ្អើលណាស់ បន្ទាប់ពីលោកប្រែខ្លួនពីមេក្រុមឧទ្ទាមផ្តួលរំលំមេដឹកនាំផ្តាច់ការ មកក្លាយជាប្រធានាធិបតីស៊ីរី ហើយចាប់តាំងពីពេលនោះមក ក៏បានធ្វើដំណើរជុំវិញពិភពលោកដើម្បីព្យាយាមបង្ហាញខ្លួនឯងថាជាមេដឹកនាំប្រកាន់ជំហរកណ្ដាល ដែលចង់បង្រួបបង្រួមជាតិ និងបញ្ចប់ភាពឯកោអន្តរជាតិរាប់ទសវត្សរ៍របស់ស៊ីរី។

លោក Trump បានជួបជាមួយលោក Sharaa នៅក្នុងដំណើរទស្សនកិច្ចលើកដំបូងមិនធ្លាប់មានរបស់ប្រធានាធិបតីស៊ីរីទៅកាន់ទីក្រុងវ៉ាស៊ីនតោន រយៈពេល ៦ខែបន្ទាប់ពីកិច្ចប្រជុំលើកដំបូងរបស់មេដឹកនាំទាងពីរនៅអារ៉ាប៊ីសាអ៊ូឌីត។ ក្នុងការស្វាគមន៍បែបស្ងាត់ស្ងៀមមួយ លោក Sharaa ដែលធ្លាប់ត្រូវអាមេរិកផ្ដល់ប្រាក់រង្វាន់ចាប់ខ្លួន ១០លានដុល្លារ បានចូលសេតវិមានតាមទ្វារចំហៀង ជំនួសឱ្យទ្វារធំ West Wing ជាទីដែលកាមេរ៉ារបស់អ្នកកាសែតតែងតែថតបាន ពេលលោក Trump ស្វាគមន៍ភ្ញៀវ VIP។

ថ្លែងទៅកាន់អ្នកសារព័ត៌មាន លោក Trump បានលើកសរសើរលោក Sharaa ថាជា "មេដឹកនាំដ៏រឹងមាំ" ហើយបង្ហាញពីទំនុកចិត្តលើមេដឹកនាំស៊ីរីរូបនេះ ដោយនិយាយថា៖ «អាមេរិកនឹងធ្វើគ្រប់យ៉ាងដែលអាចធ្វើបានដើម្បីជួយស៊ីរី ឱ្យមានភាពជោគជ័យ»៕