សារព័ត៌មាន Financial Times (FT) បានរាយការណ៍នៅថ្ងៃអង្គារ (១១ វិច្ឆិកា) នេះថា គណៈកម្មការអឺរ៉ុប បានចាប់ផ្តើមបង្កើតស្ថាប័នចារកម្មសម្ងាត់ថ្មីមួយ ក្រោមការដឹកនាំរបស់ប្រធានប្លុកអឺរ៉ុប លោកស្រី Ursula von der Leyen ក្នុងគោលបំណងធ្វើឱ្យប្រសើរឡើងនូវការប្រើប្រាស់ព័ត៌មានដែលប្រមូលបានដោយភ្នាក់ងារចារកម្មជាតិទាំងអស់។

កិច្ចប្រឹងប្រែងនេះឆ្លុះបញ្ចាំងពីកង្វល់សន្តិសុខកាន់តែខ្លាំង និងការជំរុញយ៉ាងទូលំទូលាយដើម្បីពង្រឹងហេដ្ឋារចនាសម្ព័ន្ធសន្តិសុខឯករាជ្យរបស់អឺរ៉ុប បន្ទាប់ពីប្រតិបត្តិការយោធារបស់រុស្ស៊ី លើអ៊ុយក្រែន និងសញ្ញាដកថយរបស់លោកប្រធានាធិបតីអាមេរិក Donald Trump លើសន្តិសុខទ្វីបនេះ។

អង្គភាពថ្មីនេះ នឹងត្រូវបានបង្កើតឡើងនៅក្នុងអគ្គលេខាធិការដ្ឋាននៃគណៈកម្មការអឺរ៉ុប ហើយនឹងជួលមន្ត្រីមកពីទូទាំងសហគមន៍ចារកម្មសហភាពអឺរ៉ុប និងប្រមូលផ្តុំដំណឹងសម្ងាត់សម្រាប់គោលបំណងរួមគ្នា នេះបើតាមសេចក្ដីរាយការណ៍របស់ FT ដោយសម្អាងដល់ប្រភព ៤នាក់ ដែលដឹងផែនការនេះ។

ប្រភពនិយាយថា អ្នករិះគន់បារម្ភថា មុខងាររបស់អង្គភាពថ្មីនេះអាចជាន់គ្នាជាមួយមណ្ឌលចារកម្ម និងស្ថានការណ៍ (Intcen) ដែលមានស្រាប់របស់ប្លុក និងធ្វើឱ្យខូចលទ្ធភាពជោគជ័យរបស់ខ្លួន។ ផែនការនេះមិនទាន់ត្រូវបានចែករំលែកជាផ្លូវការ ជាមួយរដ្ឋជាសមាជិកទាំង២៧ នៅឡើយទេ៕