បើយោងតាមការវិភាគដោយអាជ្ញាធរអ៊ុយក្រែនដែលបានបង្កើតឯកសារសម្ងាត់ ស្តីពីការផ្គត់ផ្គង់យោធារបស់ទីក្រុងមូស្គូ បានឲ្យដឹងថា ប្រហែល ៧០ភាគរយនៃគ្រាប់រំសេវដែលបច្ចុប្បន្នប្រើដោយរុស្ស៊ី ក្នុងសង្រ្គាមប្រឆាំងនឹងអ៊ុយក្រែន ត្រូវបានផលិតនៅកូរ៉េខាងជើង។

ឯកសារដែលសារព័ត៌មាន Kyodo បានឃើញ បានបង្ហាញថា ទីក្រុងព្យុងយ៉ាងបានផ្តល់គ្រាប់ផ្លោងចំនួន ៦,៥លានគ្រាប់ដល់រុស្ស៊ី ចាប់តាំងពីដើមដំបូងនៃការលុកលុយពេញលេញរបស់ទីក្រុងមូស្គូលើអ៊ុយក្រែន កាលពីខែកុម្ភៈ ឆ្នាំ២០២២ ដើម្បីជាថ្នូរនឹងការទទួលបានបច្ចេកវិទ្យាយោធាពីរុស្ស៊ី ក្នុងការផលិតអាវុធរបស់ខ្លួន។

ឯកសារដែលបានគូសបញ្ជាក់អំពីរបៀបដែលរុស្ស៊ីទទួលបានការផ្គត់ផ្គង់យោធាពីកូរ៉េខាងជើង បានឲ្យដឹងថា ទីក្រុងព្យុងយ៉ាងបានទទួលបច្ចេកវិទ្យារបស់រុស្ស៊ី ទាក់ទងនឹងប្រព័ន្ធការពារដែនអាកាស និងការអភិវឌ្ឍអវកាស ព្រមទាំងជំនួយចំនួន ២០ពាន់លានដុល្លារអាមេរិក។

ហើយជាមួយគ្នានេះ ឯកសារដែលបានចងក្រងកាលពីខែកញ្ញា ក៏បានលើកឡើងផងដែរថា បច្ចេកវិទ្យានុយក្លេអ៊ែររបស់រុស្ស៊ី ត្រូវបានផ្ទេរទៅឲ្យកូរ៉េខាងជើង។ ការរកឃើញនេះបានគូសបញ្ជាក់ពីទំនាក់ទំនងយោធាកាន់តែស៊ីជម្រៅ រវាងរុស្ស៊ី និងកូរ៉េខាងជើង ដែលបានបញ្ជូនទាហានទៅជួយក្រុងមូស្គូ ក្នុងសង្គ្រាម ដែលកំពុងបន្តមានប្រឆាំងនឹងអ៊ុយក្រែន៕