ប៉ុន្មានម៉ោងបន្ទាប់ពីលោកប្រធានាធិបតី Donald Trump បានស្វាគមន៍សមភាគីស៊ីរី លោក Ahmed al-Sharaa សម្រាប់កិច្ចពិភាក្សាជាប្រវត្តិសាស្ត្រ នៅសេតវិមាន កាលពីថ្ងៃចន្ទ (ទី១០ ខែវិច្ឆិកា) មន្ត្រីអាមេរិកម្នាក់បាននិយាយថា ស៊ីរីកំពុងចូលរួមក្នុងសម្ព័ន្ធសកលប្រឆាំងនឹងក្រុម ISIS។

លោក Sharaa ដែលកងកម្លាំងរបស់លោក បានទម្លាក់អ្នកកាន់អំណាចដ៏យូរ គឺលោក Bashar al-Assad កាលពីចុងឆ្នាំមុន គឺជាមេដឹកនាំស៊ីរីដំបូងគេដែលបានធ្វើទស្សនកិច្ចនៅសេតវិមាន គិតចាប់តាំងពីប្រទេសតំបន់មជ្ឈិមបូព៌ាមួយនេះ ទទួលបានឯករាជ្យក្នុងឆ្នាំ១៩៤៦។

ហើយដំណើរទស្សនកិច្ចដ៏សំខាន់របស់បុរសវ័យ ៤៣ឆ្នាំរូបនេះ នៅការិយាល័យប្រធានាធិបតីអមេរិក បានកើតឡើងប៉ុន្មានថ្ងៃបន្ទាប់ពីក្រុងវ៉ាស៊ីនតោនបានដករូបលោកចេញពីបញ្ជីទណ្ឌកម្មរបស់ខ្លួន។ ក្រុមរបស់ Sharaa គឺ Hayat Tahrir al-Sham (HTS) ពីមុនមានទំនាក់ទំនងជាមួយក្រុមអាល់កៃដា។

មន្ត្រីរដ្ឋបាលជាន់ខ្ពស់មួយរូប បានប្រាប់ឲ្យដឹងថា៖ «អំឡុងទស្សនកិច្ចនេះ ប្រទេសស៊ីរីបានប្រកាសថា ខ្លួនកំពុងចូលរួមជាមួយសម្ព័ន្ធសកល ដើម្បីកម្ចាត់ក្រុម ISIS ក្លាយជាសមាជិកទី៩០ នៃសម្ព័ន្ធភាពនេះ និងជាដៃគូជាមួយសហរដ្ឋអាមេរិក ដើម្បីលុបបំបាត់សមាជិកនៅសេសសល់របស់ក្រុម ISIS និងបញ្ឈប់លំហូរយុទ្ធជនបរទេស»។

យោងតាមមន្ត្រីរូបនោះ បានឲ្យដឹងទៀតថា ស៊ីរីក៏នឹងត្រូវបានអនុញ្ញាតផងដែរឲ្យបន្តទំនាក់ទំនងការទូតជាមួយទីក្រុងវ៉ាស៊ីនតោន «ដើម្បីប្រឆាំងភេរវកម្ម ផ្នែកសន្តិសុខ និងការសម្របសម្រួលសេដ្ឋកិច្ចបន្ថែមទៀត»។

លោក Trump បានលើកឡើងថា រូបលោកចង់ឲ្យស៊ីរីក្លាយជា «ប្រទេសជោគជ័យខ្លាំង» បន្ទាប់ពីមានសង្គ្រាមស៊ីវិលជាង ១ទសវត្សរ៍ ហើយបានបន្ថែមថា លោកជឿថា លោក Sharaa អាចធ្វើបាន និងពិតជាធ្វើបាន»។ ហើយលោក Trump បានសង្កត់ធ្ងន់ថា ប្រទេសស៊ីរី គឺជា «ផ្នែកមួយដ៏ធំ» នៃផែនការរបស់លោក សម្រាប់ផែនការសន្តិភាពមជ្ឈិមបូព៌ាកាន់តែទូលំទូលាយ ដែលប្រធានាធិបតីអាមេរិកសង្ឃឹមថា គម្រោងនេះនឹងជួយគាំទ្រដល់បទឈប់បាញ់ដ៏ផុយស្រួយ រវាងអ៊ីស្រាអែល និងក្រុមហាមាស នៅតំបន់ហ្កាហ្សា៕