សហភាពអាហ្វ្រិក បានអំពាវនាវឲ្យមានការឆ្លើយតបជាបន្ទាន់ពីអន្តរជាតិ រួមទាំងការចែករំលែកព័ត៌មានស៊ើបការណ៍សម្ងាត់ ដើម្បីដោះស្រាយស្ថានភាពសន្តិសុខកាន់តែអាក្រក់ នៅក្នុងប្រទេសម៉ាលី ជាកន្លែងដែលក្រុមឧទ្ទាមកំពុងបិទផ្លូវប្រេងឥន្ធនៈ និងចាប់ជំរិតជនបរទេស។

ក្រុមសកម្មប្រយុទ្ធដែលមានទំនាក់ទំនងជាមួយក្រុមអាល់កៃដា ដែលសកម្មនៅក្នុងតំបន់ Sahel នៃអាហ្វ្រិកខាងលិច បានរារាំងការនាំចូលប្រេងឥន្ធនៈ ចាប់តាំងពីខែកញ្ញា ដោយបានវាយប្រហារក្បួនរថយន្តដឹកប្រេង និងបង្កើតការខ្វះខាតដែលបង្ខំឲ្យសាលារៀន និងអាជីវកម្មនានាបិទទ្វារ។

ការបង្ហាញកម្លាំងចុងក្រោយបំផុតដោយក្រុម Jama’at Nusrat Al-Islam wal-Muslimin បានបង្កើនការព្រួយបារម្ភថា នៅទីបំផុត ក្រុមនេះ អាចនឹងព្យាយាមដាក់ការគ្រប់គ្រងរបស់ខ្លួនលើប្រទេសដែលគ្មាន   សមុទ្រនេះ។ បណ្តាប្រទេសលោកខាងលិច រួមទាំងសហរដ្ឋអាមេរិក បារាំង អង់គ្លេស និងអ៊ីតាលី កំពុងជំរុញឲ្យពលរដ្ឋរបស់ពួកគេចាកចេញ។

នៅក្នុងសេចក្តីថ្លែងការណ៍មួយកាលពីថ្ងៃអាទិត្យ លោក Mahmoud Ali Youssouf ប្រធានគណៈកម្មការសហភាពអាហ្វ្រិក បានសម្តែងការព្រួយបារម្ភយ៉ាងខ្លាំងចំពោះស្ថានភាពសន្តិសុខកាន់តែយ៉ាប់យ៉ឺនយ៉ាងឆាប់រហ័ស នៅក្នុងប្រទេសម៉ាលី ជាកន្លែងដែលក្រុមភេរវករ បានបិទផ្លូវ រំខានដល់ការទទួលបានការផ្គត់ផ្គង់សំខាន់ៗ និងធ្វើឲ្យស្ថានភាពមនុស្សធម៌កាន់តែអាក្រក់ឡើងៗសម្រាប់ប្រជាជនស៊ីវិល៕