នៅថ្ងៃអង្គារនេះ ក្រុមអាជ្ញាធរម៉ាឡេស៊ី បានស្រង់សាកសពមនុស្សបន្ថែមទៀត នៅក្នុងប្រតិបត្តិការរុករកកំពុងបន្តរបស់ពួកគេ សម្រាប់ជនជាតិរ៉ូហ៊ីងយ៉ាបាត់ខ្លួន ក្រោយទូករបស់ពួកគេលិចនៅជិតព្រំដែនថៃ និងម៉ាឡេស៊ី ដោយបានសម្លាប់មនុស្សយ៉ាងហោច ២៧នាក់ ។

ក្រុមជួយសង្រ្គោះ បានរុករកនៅតំបន់ជិតកោះ Langkawi ចាប់តាំងពីទូកបានលិចកាលពីសប្តាហ៍មុន ។ ក្រុមមន្រ្តីនិយាយថា នៅថ្ងៃអង្គារនេះ ពួកគេបានស្រង់សាកសពមនុស្ស ៩នាក់បន្ថែមទៀត រួមទាំងសាកសពមនុស្សម្នាក់ នៅប្រទេសថៃ ។

កាលពីថ្ងៃចន្ទ កងល្បាតរបស់ម៉ាឡេស៊ី បានបន្តប្រតិបត្តិការស្វែងរកក្នុងដែនទឹកនៃសមុទ្រ Andaman ដើម្បីតាមរកសមាជិករាប់សិបនាក់ទៀតនៃជនជាតិភាគតិចរ៉ូហ៊ីងយ៉ា ។

យោងតាមការអះអាងរបស់លោក Khairul Azhar Nuruddin ប្រធាននគរបាលនៅកោះ Langkawi ភាគខាងជើងម៉ាឡេស៊ី ដែលជាតំបន់នៃប្រតិបត្តិការស្វែងរក បានឲ្យដឹងថា ដំបូងឡើយ ជនជាតិរ៉ូហ៊ីងយ៉ារាប់រយនាក់បានឡើងជិះនាវាធំមួយគ្រឿងឆ្ពោះទៅម៉ាឡេស៊ី កាលពី ២សប្តាហ៍មុន ប៉ុន្តែត្រូវផ្ទេរទៅទូកតូចៗចំនួន ២គ្រឿង កាលពីថ្ងៃព្រហស្បតិ៍កន្លងទៅ ។ 

អាជ្ញាធរម៉ាឡេស៊ីនិយាយថា ក្នុងនោះ ទូកតូចមួយគ្រឿង ផ្ទុកមនុស្សប្រហែល ៧០នាក់ បានលិចនៅជិតកោះ Langkawi ក្នុងថ្ងៃដដែល ហើយជោគវាសនាទូកមួយគ្រឿងទៀតដែលផ្ទុកអ្នកដំណើរ ២៣០នាក់ នៅតែមិនច្បាស់នៅឡើយនោះទេ ៕